ТОШКЕНТ – Ўзбекистон ҳуқуқ-тартибот идоралари таъқиқланган «Ҳузбут-Таҳрир» экстремистик ташкилотининг бўлинмасини тузишда гумон қилиб, тўрт киши, жумладан икки нафар аёлни қўлга олди, деб хабар берди 1news.uz сешанба, 12-декабрь куни.
Қўлга олинганларнинг уч нафари қамоқхонада сақланмоқда, тўртинчиси – уч нафар фарзанднинг ёлғиз онаси бўлган аёл эса уй қамоғида, деб маълум қилди милиция расмийси душанба, 11-декабр куни РИА-Новости агентлигига.
Гумондорлар яшаган уйни тинтув қилиш чоғида таъқиқланган экстремистик адабиётлар, видеолар ҳамда «Ҳизбут-Таҳрир» ғояларини ифодаловчи материаллар ёзилган хотира қурилмалари мусодара қилинган.
Гумондорларга «экстремистик, айирмачилик, ақидапарастлик ёки бошқа таъқиқланган ташкилотларни тузиш, уларга аъзо бўлиш ёки раҳбарлик қилиш» айблови қўйилган.
Айблари исботланган тақдирда уларга 5 йилдан 15 йилгача қамоқ жазоси берилиши мумкин.
2016-йилнинг ноябрида жиноий ишлар бўйича Фарғона вилоят суди «Ҳизбут-Таҳрир»нинг 15 нафар аъзосини 7 йилдан 10 йилгача турли муддатларга қамоқ жазосига ҳукм қилганди. Айбланувчилар Сурия ва Ироққа бориб, террорчи гуруҳлар сафида жанговар тайёргарликдан ўтишни режалаштирганлар.