ОСТОНА – Ўтган ҳафта Остонага дунёнинг 40 та ҳукумат делегацияси ташриф буюрган KADEX-2018 халқаро қурол-яроғ кўрмазмасигамезбонлик қилди.
23-26 май кунлари бўлиб ўтган кўргазмада 28 давлатнинг мудофаа саноати соҳасидаги 318 та халқаро корхонаси, жумладан, АҚШнинг «IOMAX USA», Исроилнинг «Elbit Systems», Нидерландиянинг «Airbus Group» ва бошқа компаниялар ўз маҳсулотлари билан иштирок этдилар.
«Кўргазма давомида имзоланган шартнома ва келишувлар мудофаа саноати соҳасидаги маҳаллий ва хорижий корхоналар ривожига хизмат қилади», деди 23 май куни кўргазманинг очилишида сўзга чиққан Қозоғистон президенти Нурсултон Назарбоев.
«Бу шунингдек, сармояларни жалб қилиш, экспорт имкониятларини ва умуман Қозоғистон иқтисодиётида рақобатбардошликни оширишга ёрдам беради», деди у.
«Казакҳстан Энгинееринг» маҳсулоти бўлган «Қорақурт» жанговар роботи Остонада 24 май куни ўтказилган KADEX-2018 кўргазмасида. Ташкилотчиларга кўра, бу йил кўргазмага 4000 дан ортиқ одам ташриф буюрди. (Айдар Ашимов)
KADEX Марказий Осиёда бу турдаги ягона кўргазмадир, деди у.
«Кўргазма 2010 йилдан бери ҳар икки йилда ўтказиб келинмоқда», деди Қозоғистон Мудофаа ва аерокосмик саноат вазири ўринбосари Асет Курмангалиев Карвонсарой нашрига.
«Қозоғистон мудофаа вазирлиги тараққиётнинг янги босқичига қадам қўйишга ҳаракат қилмоқда ва KADEX-2018 кўргазмаси бунга туртки бўлиб хизмат қилади», деди у.
Қурол-яроғ кўргазмасини ўтказишдан асосий мақсад – янги шартномаларни имзолаш, қурол ишлаб чиқарувчиларни мамлакатга жалб қилиш ва Қозоғистонда ишлаб чиқарилган қуролларни хориж бозорларида сотилишини рағбатлантириш, деди Курмангалиев.
