DUSHANBE – Dushanba, 2-apreldan Tojikiston O‘zbekistonga elektr energiyasi yetkazib berishni boshladi, deb xabar beradi AsiaPlus.tj tojik hukumatidagi manbaga asoslanib.
Bu 2016-yilda Shavkat Mirziyoyev O‘zbekiston prezidenti bo‘lganidan beri ikki mamlakat o‘rtasidagi aloqalarning yaxshilanishiga oid navbatdagi yangilik bo‘ldi. O‘zbekiston 2009-yilda Markaziy Osiyo yagona energotizimidan chiqib, Tojikiston bilan energetika sohasidagi hamkorlikni to‘xtatgan edi.
Endilikda Tojikistonning “Regar” podstansiyasidan O‘zbekistonning “Gulcha” podstansiyasiga elektr uzatish liniyasi orqali yiliga 1,5 mlrd. kVt/soatdan kam bo‘lmagan hajmda elektr energiyasi yetkazib berilishi kutilmoqda.
Ikki mamlakat o‘rtasida erishilgan kelishuvga ko‘ra, yoz mavsumida O‘zbekiston bir kVt elektr uchun 2 AQSH senti to‘laydi. Qishda bu narx bir kVt uchun 2,5 sentga ko‘tariladi.
Rasmiy ma’lumotlarga qaraganda, Tojikiston 1 may - 30 sentyabr oralig‘ida 5 mlrd. kVt/soatgacha elektr energiyasi eksport qila oladi.
O‘tgan yili mamlakat 1,3 mlrd. kVt/soat elektr energiya eksport qilib, 50 mln. dollar ishlab olgandi. Shuningdek, o‘tgan yili yozda Tojikistondan Qirg‘izistonga 600 mln. kVt/soat elektr energiyasi yetkazib berilgan.
