DUShANBE – Tojikiston va Afgʻoniston bu ikki mamlakatni Turkmaniston bilan bogʻlaydigan temiryoʻl qurilishi boʻyicha kelishuvga erishdilar. Bu haqda Asia-Plus nashri xabar berdi.
Bu haqda chorshanba (17-iyul) kuni Dushanbeda Tojikiston bosh vaziri oʻrinbosari Suhrob Mirzozoda maʼlum qilgan.
Mirzozodaga koʻra, tomonlar bu masalani iyul oyi boshida savdo-iqtisodiy hamkorlik boʻyicha tojik-afgʻon komissiyasining Dushanbeda oʻtgan majlisida muhokama qilganlar.
Uning aytishicha, hozirda Tojikiston-Afgʻoniston ishchi guruhi yoz oxirigacha imzolanishi kutilayotgan shartnomani ishlab chiqmoqda. Shundan soʻng, loyihani moliyalashtirish ishlari boshlanadi, deb qoʻshimcha qildi u.
Afgʻoniston, Tojikiston va Turkmaniston prezidentlari 2013-yilning 5-iyun kuni uch mamlakatni bogʻlaydigan Turkmaniston-Afgʻoniston-Tojikiston (TAT) temir yoʻli qurilishini boshlab bergan edilar.
Temiryoʻlning taklif etilgan yoʻnalishlari oʻzgargan boʻlsa-da, uning uzunligi Turkmanistonning Otamurod shahridan Afgʻoniston orqali Tojikistonning Panj shahrigacha – 400 kilometr uzunlikda boʻlishi koʻzda tutilgan.
Rejadagi temiryoʻl Hind okeani orqali Markaziy Osiyo va jahon bozori oʻrtasida transport yoʻlagini ochish boʻyicha mintaqaviy tashabbusning bir qismidir. U Markaziy Osiyo uchun Boltiq dengizi orqali Rossiya hududidan kesib oʻtishdan ancha qisqaroqdir.
Afgʻonistonga qoʻshni mamlakatlar iqtisodiy rivojlanish yoʻli bilan ekstremizmni yengishga yordam beradigan turli tashabbuslarni ilgari surmoqdalar.
