Россиянинг Сурияда ИД устидан ғалаба эълон қилгани «бемаънилик» деб ҳисобланмоқда

Кузатувчиларнинг эътироф этишича, Россиянинг «Ислом давлати» устидан эълон қилган ғалабаси сиёсий найрангдан бошқа нарса эмас.

7 декабрь куни Россия мудофаа вазирлиги ИДни Суриядан қувиб чиқариш бўйича миссия ўз ниҳоясига етгани ва мамлакат ушбу гуруҳдан «буткул озод этилгани» ҳақида эълон қилди.

«Россия қуролли кучлари Суриядаги ИД террорчилик ташкилотига мансуб қуролланган гуруҳларини енгиш мақсадига эришди», деди катта ҳарбий зобит Сергей Рудской. У Россия ҳарбий кучлари Суриядан олиб чиқилишини эълон қилди.

«Сурияда ИД назорати остида бўлган бирорта ҳам қишлоқ ёки туман қолмади. Сурия ҳудуди ушбу террорчилик ташкилоти жангариларидан бутунлай озод қилинди», деди у.

Аммо ИД Суриянинг айрим ҳудудларида маҳкамланиб олган ва ҳукумат, Россия ҳамда Ироқ назоратида бўлган янги ерларни эгаллаган.

Яқинда олинган маълумотларга кўра, Сурияда ИД яксон этилмагани аниқ, дейди террорчи гуруҳлар бўйича мутахассис, мисрлик собиқ генерал-майор Яҳё Муҳаммад Али.

«Бу Россия ўтган йил охиридан бери таъкидлаб келаётган гап-сўзларнинг акси. Ўшанда улар катта тантана билан ИД устидан ғалаба қозонганларини ва Россия ҳарбийларининг миссияси якунланганини эълон қилишганди», деди у.

Сиёсий устомонлик

«ИД жангарилари, ҳақиқатан ҳам, Сурия ва Россия кучлари билан тўқнашган ерларидан бошқа ҳудудларга кўчиб ўтишган, аммо улар кейинчалик қайтиш учун бу ерларни вақтинча тарк этганлар», дейди Али.

Бундай ҳолатлар Дайр Аз-зор, Албу Камол ва Ал-Бадиянинг баъзи қисмлари ҳамда Тадмурнинг (Палмира) айрим ҳудудларида юз берган, деди у.

«Бу Ал-Раққада бўлгани каби, ҳаво ҳужумлари натижасида ИД жангарилари енгилгани ёки йўқ қилинганини эмас, балки чекинишга мажбур бўлганидан дарак беради», деди у.

Россиянинг баёноти сиёсий уддабуронлик ва Суриянинг қутқарувчиси ўлароқ кўриниш учун қилаётган ҳаракатлардан бошқа нарса эмас. У мамлакатни терроризмдан қутқариб, ўзининг сиёсий, иқтисодий ва ҳарбий ролини оқлашга уринмоқда, дейди Али.

ИД устидан ғалаба уни ўз назоратидаги ҳудудлардан қувиб чиқариш билан чекланмайди, дейди Сурия демократик кучлари зобити Фарҳод Хўжа.

Бу – миналар ва портловчи моддаларни олиб ташлаш, аввал ИД назоратида бўлган ва ҳозирда Сурия режимига қарашли ҳудудларни қўллаб-қувватлаш каби бошқа операцияларга ҳам боғлиқ, деб интервью берди у Дияруна нашрига.

«Булар ҳақиқатда фалокат ҳудудлари ва кимсасиз жойлардир», деди у.

Доимий мажбуриятлар

Шу билан бир вақтда, Сурия демократик кучлари ва халқаро коалиция ҳаракат қилаётган ерларда хавфсизлик, инфратузилма ва бошқарувни тиклаш бўйича саъй-ҳаракатлар давом этмоқда, дейди Хўжа.

«Ушбу ҳудудларда, ИДни йўқ қилиш бўйича шиддатли тўқнашувларга қарамай, ҳаёт нормал ҳолатга қайтмоқда ва кўчиб кетган одамларнинг кўпчилиги ортга қайтган», деди у ва қайта таъмирлаш ишлари олиб борилаётгани ҳамда коммунал хизматлар тикланаётганини қайд этди.

«Ал-Раққа халқи ортга қайтди, шаҳар ва қишлоқ аҳолисидан иборат маҳаллий кенгаш уни бошқаряпти», деб қўшимча қилди Хўжа. У ҳатто хавфсизлик ҳам маҳаллий аҳоли томонидан бошқарилаётганини таъкидлаган.

Маҳаллий аҳоли ўз уйига қайтиши учун миналарни зарарсизлантириш ва тозалаш ишлари олиб борилмоқда, худди шундай ишлар ал-Табқада ҳам давом этмоқда, деди у.

«Россиянинг Сурияда ИД устидан ғалаба қозонгани ҳақидаги иддаолари қуруқ сафсата», деди Суриялик журналист Муҳаммад ал-Абдуллоҳ.

«Ҳарбий томондан қараладиган бўлса, гуруҳ Суриянинг айрим ҳудудлари, жумладан, Ғутадаги бир нечта ҳудуд, ал-Ярмук лагери ҳамда шимоли-шарқий Ҳамадаги стратегик ҳудудлар, Ҳомс ва Идлиб қишлоқларининг бир қисми ҳамда Дайр Аз-зорнинг унча катта бўлмаган қисмида тўлиқ назорат ўрнатган», деди у.