Кремлпараст телебошловчининг Қозоғистонга ҳужум қилиш ҳақидаги таклифи фуқароларни ғазабга солди

ОЛМАОТА – Кремлпараст журналистнинг Олмаотадаги лабораторияни портлатиш ҳақидаги таклифи қозоғистонликларнинг ғазабини қўзғади.

Россиялик тележурналист Владимир Соловьёвнинг 25 июнь куни «Россия-1» давлат телеканали эфирида узатилган «Владимир Соловьёв билан оқшом» кўрсатувида таҳлилчилар геосиёсат, қудратли давлатларнинг тўқнашуви ва микробиология соҳасидаги ҳарбий ишланмаларни муҳокама қилганлар.

Муҳокама вақтида Россия давлат Думаси депутати Геннадий Онишченко томошабинларга Олмаотадаги янги лаборатория америкаликларга тегишли экани ва у ерда «деярли барча машҳур вирус ва микроблар» билан иш олиб борилаётганини айтиб нотўғри ахборот берган.

Аслида эса Олмаотадаги марказий референс-лабораторияси Карантин ва зооноз касалликлар бўйича Қозоғистон илмий марказига тегишли бўлиб, мамлакат соғлиқни сақлаш вазирлигининг шўъба ташкилоти ҳисобланади.

АҚШ ҳукумати ушбу лаборатория қурилишини молиялаштирган. Лаборатория замонавий ва хавфсиз технологиялар ёрдамида юқумли касалликлар ташхиси билан шуғулланади.

Лаборатория мутахассислари Европа Иттифоқи томонидан молиялаштирилган таълим лойиҳалари доирасида Қозоғистон Соғлиқни сақлаш вазирлиги, Таълим ва фан вазирлиги, Қишлоқ хўжалиги вазирлигининг илмий ходимларига биологик хавфсизлик бўйича семинар ва тренинглар ўтадилар.

Бироқ, Соловьёв бу лабораториянинг Россияга хавф туғдириши мумкинлиги айтиб ва «муаммони ҳал қилиш учун» радикал таклиф билан чиққан.

«Портлатиб юборсак-чи? Лаборатория қаердалигини биламиз. Шундоқ олиб, портлатиб юборсак», деди у превентив ҳужумни назарда тутиб.

Онишченко Олмаотада миллионлаб одам яшашини ва лаборатория шаҳар марказида жойлашганини айтиб, таклифга эътироз билдирган.

«Бунинг учун юқори аниқликда нишонга олувчи махсус қуроллар ҳам бор», деди Соловьёв.

«Ёқимсиз агрессор»

Соловьёвнинг Қозоғистон ҳудудига йўналтирилган «зарба» бериш ҳақидаги таклифини Олмаотадаги Nur.kz янгиликлар сайти ёзиб чиқди. Қозоғистонлик муштарийлар россиялик телебошловчининг ёндашувидан ғазабга тушиб, мақола остида уни танқид қилганлар.

«Россия ташвиқотини террорчилик фаолияти деб тан олиш вақти келди», дейди ўқувчилардан бири.

«Шоумен Кремлдан мўмай пул ишлаш учун ҳамма нарсага тайёр», деди яна бир киши.

Бу кремлпараст телебошловчининг Қозоғистонни биринчи бор танқид қилиши эмас.

2018 йил апрель ойида Қозоғистон БМТ хавфсизлик кенгашида овоз беришдан бош тортди, ўшанда Россия Суриядаги коалиция ҳаво зарбаларини қораловчи ўз резолюцияси лойиҳасини таклиф қилганди. Бу ҳаво зарбалари Сурия президенти Башар Асаднинг бир неча кун аввал кимёвий қурол ишлатганига жавобан амалга оширилган эди.

Ўшанда Соловьёв ўз дастурида икки давлат ўртасидаги муносабатлар муаммосига тўхталиб ўтган эди.

«Қозоғистон билан муносабатларимизда нимадандир бехабар қолдикми? Орамиздан қора мушук ўтдими? Ёки кейинги «майдан» (Украинадаги Кремлга қарши намойишлар) Қозоғистонга йўналтирилишини кутамизми?», деб савол берган эди у.

Ўз вақтида қозоқлар унинг бу сўзларига ҳам кескин муносабат билдирган эдилар.

Қозоғистон бундай қўшни билан бошқа «дўст» бўлиши керак эмас, деган эди қозоқ миллий курашини ривожлантириш жамғармаси асосчиси, олмаоталик Арман Шораев Facebook постида.

«Ҳа, ўртоқлар. Мамлакатингиз ҳақида бир нарсани билмайсиз шекилли. Сиз Британияда ўз фуқароларини ва Сурияда бегуноҳ одамларни заҳарлаётган, яккаланиб бораётган давлатга айланмоқдасиз. Сиз собиқ иттифоқчиларидан ерларини тортиб олаётган ёқимсиз агрессорга айланиб улгурдингиз. Билмасмидингиз? Унда билиб қўйинг, бундай давлат билан йўлимиз айро», деб ёзган Шораев.

Россиянинг «қовуғи»

Жамоатчилик билан алоқалар бўйича мутахассис ва Олмаотанинг «Курсив» бизнес нашрининг собиқ реклама менежери Мирлан Телебарисов Соловьёвнинг дастурида Дума депутати Онишченконинг бошқа бир гапига эътибор қаратди.

Телебарисов дастурда Онишченконинг Марказий Осиёни назарда тутиб, «20 дан ортиқ энг замонавий лаборатория ташкил этилган мана шу қовуқ бизни ташвишга солмоқда», деганини эслатиб ўтган.

«Москва ўз расмий баёнотларида нима дейишидан қатъий назар, Россия сиёсатчиларининг минтақамизга муносабатини тушуниш учун одам анатомияси мутахассиси бўлиш шарт эмас», деб айтган Телебарисов интервьюда.

Кремль федерал телеканаллар орқали Марказий Осиё давлатларига уларнинг керагидан ортиқ мустақиллиги нималарга олиб келиши мумкинлиги ҳақида огоҳлантирувчи сигналлар юбормоқда, деди Нур-Султонлик тадбиркор Владимир Приходько.

«Агар Қозоғистоннинг ҳатти-ҳаракатларида нимадир ёқмаса, буни Владимир Путин ёки ташқи ишлар вазири Сергей Лавров оммавий равишда танқид қилмаслиги аниқ. Уларнинг ўрнига бу ишни давлат телеканаллари амалга оширади», деди Приходько.

Путин ўзини гуёки Москва ҳали-ҳамон совет республикаларини бошқараётган ва «қовуқдаги» давлатларни назорат қила оладиган ҳамда уларнинг ҳудудида қурол-аслаҳаларини қўллаши мумкин бўлган дунёда яшаётгандек тутмоқда, деди Приходько.

Россия давлат телеканалларининг сиёсий позицияси томошабинлар ишончининг пасайишига сабаб бўлмоқда, дейди бишкеклик сиёсий таҳлилчи Аскат Дукенбаев.

«Бунинг сабаби битта: кремлпараст ОАВ ҳамма нарса - ташвиқот, манипуляция, дезинформация билан шуғулланяпти, лекин профессионал журналистика билан эмас», деди у.