ДУШАНБЕ – Душанба (22 июль) куни чегарада юзага келган тангликка қарамай, Тожикистонда президент Эмомали Раҳмоннинг қирғизистонлик ҳамкасби Сооронбай Жеенбеков билан учрашувига тайёргарлик давом этмоқда, деб хабар беради «Азия-Плюс».
Раҳмон ва Жеенбеков жума (26 июль) куни Тожикистоннинг Исфара шаҳрида музокара ўтказадилар.
Тожик ҳукуматидаги манбанинг маълум қилишича, икки давлат ўртасидаги умумий чегаранинг баҳсли ҳудудларини демаркация ва делимитация қилиш президентлар учрашувининг асосий мавзуи бўлади.
Марказий Осиёда совет диктатори Иосиф Сталиндан мерос – «бўлиб ташла ва ҳукмронлик қил» тамойили жорий этилган даврлардан бери чегарага оид низолар юз бериб туради.
Ворухдаги тўқнашувлар
Учрашув тожикистонлик чегарачиларнинг Қирғизистон билан чегарадаги баҳсли ҳудудда отишма юзага келгани, натижада бир эркак ҳалок бўлгани ҳақида хабар бериши ортидан бўлиб ўтиши кутилмоқда, деб ёзади AFP 23 сешанба (23 июнь) куни.
Мамлакат чегара хизматининг маълум қилишича, тўқнашувга Тожикистон назоратидаги Ворух экславида тожикистонликлар тарафидан байроқ ўрнатилгани сабаб бўлган.
Қирғизистонликлар бунга жавобан ҳудудда ўз байроқларини ўрнатганлар, деб хабар берган Тожикистон тарафи.
Келиб чиққан отишма натижасида 52 яшар тожик фуқароси ҳалок бўлган, яна 10 нафар тожикистонлик жароҳатланган.
Қирғизистон чегара хизмати ҳалок бўлганлар ҳақида маълумот бермаган бўлса-да, беш киши жароҳатлангани ва ҳудуддаги асосий йўлнинг ёпилганини маълум қилган.
