Карвонсарой
Хавфсизлик

Минглаб хорижлик кўнгиллилар Россияга қарши жангларда Украина кучлари сафига қўшилмоқда

Мэтью Раттман ва AFP

Украиналик ҳарбий хизматчи россияликларни нишонга олмоқда, Киев шарқидаги Бровари шаҳри, 9 март. [Арис Месинис/AFP]

Украиналик ҳарбий хизматчи россияликларни нишонга олмоқда, Киев шарқидаги Бровари шаҳри, 9 март. [Арис Месинис/AFP]

КИЕВ – Минглаб халқаро кўнгиллилар босқинчи Россия қуролли кучларига қарши курашиш учун Украинага етиб боришди. Бу эса Кремлнинг ҳаракатларига нисбатан норозилик глобал миқёсда эканлигини англатади.

«Ҳозирда уларнинг сони 20 мингга яқин. Улар асосан Европа давлатларидан келишмоқда», деб айтган ташқи ишлар вазири Димитрий Кулеба АҚШнинг CNN телеканалига якшанба (6 март) куни.

«Дунёда кўпчилик Россиядан ва сўнгги йилларда у қилаётган ишлардан нафратланади, аммо ҳеч ким унга очиқдан-очиқ қаршилик қилмаган ва курашмаган», дейди у.

«Одамлар украиналиклар курашаётганини, улар таслим бўлмаётганини кўргач, бу кўпчиликни жангга қўшилишга ва Россияни босқини учун жавобгарликка тортишга ундади», деб айтди у.

24 февралда олинган суратда Киев шимоли-ғарбидаги Гостомел шаҳри ва Антонов аэропорти яқинида осмонга кўтарилаётган тутун кўринмоқда. [Дениел Лил/AFP]

24 февралда олинган суратда Киев шимоли-ғарбидаги Гостомел шаҳри ва Антонов аэропорти яқинида осмонга кўтарилаётган тутун кўринмоқда. [Дениел Лил/AFP]

Канадалик собиқ пиёда аскар Хантер Френсис Польшанинг Варшава шаҳрида, 7 март. [Анна Мария Якубек/AFP]

Канадалик собиқ пиёда аскар Хантер Френсис Польшанинг Варшава шаҳрида, 7 март. [Анна Мария Якубек/AFP]

Умумий душман

Икки ҳафтага яқин уруш давомида 2000 дан 4000 гача россиялик аскар ўлдирилган, деб хабар берган АҚШ мудофаа вазирлиги сешанба куни.

2 март куни Россия 498 киши ҳалок бўлганини расман тан олди.

Босқин бошланган 24 феврал куни кучли тўқнашув бўлган Киев чеккасидаги Гостомел шаҳри жангида хорижликлар ҳам иштирок этган.

26 феврал куни шаҳар яқинида Украина мудофааси чечен махсус кучлари каравонини йўқ қилган.

«Гостомелда Украина президенти Владимир Зеленскийга суиқасд уюштиришни режалаган чеченларнинг элита бўлинмаси йўқ қилинди», деб хабар берган Украина миллик мудофаа ва хавфсизлик кенгаши раиси Алексей Данилов 2 март куни Watch 24 телеканалида.

Украина разведкаси суиқасд ҳақида босқинга қарши бўлган Россия федерал хавфсизлик хизмати (ФСБ) ходимларидан маълумотни қўлга киритган, деб қўшимча қилган у.

Гостомел мудофаачилари орасида Украина ҳуқуқ-тартибот идораларининг грузин миллатига мансуб ходимлари бор.

«Умуман олганда, биз грузинлар учун бу уруш янгилик эмас», деб айтган 2014 йилдаги Қрим инқирози вақтида Украина учун курашган Вано Надирадзе. «Биз аввал ҳам худди шундай вазиятда бўлганмиз.»

Сўнгги саккиз йил давомида Украина хавфсизлик хизматлари ходими бўлган Надирадзе учун бу 2008 йилда Грузияда бўлган ҳолатга ўхшайди – Россиянинг навбатдаги босқини.

«Грузия ва Украинанинг душмани бир ва албатта у Россия», деб айтган у. «Россия президенти Владимир Путин нафақат ўзининг яқин қўшниси, балки бутун Ғарб дунёси билан урушаётгани аниқ бўлди.»

Путин Ғарб демократияси қадриятларига қаршилик қилади, деб қўшимча қилган Надирадзе. «У ўзига қул бўлишдан бош тортаётган ҳаммага душман, аммо Украинага бостириб кириши хато бўлди.»

«Украинага босқин улар учун бамисоли дўзахга айланиши ҳақида аввалдан огоҳлантирганмиз, аммо улар бизга ишонмаган кўринади.»

«Ҳужумнинг айни вақтдаги кўлами фақат бошланиши эканини тушунамиз, бироқ биз ҳаммасига тайёрмиз. Бу бошланиши бўлса, энди қизияпмиз демак», деб айтган у.

«Келганларида биз ваъда қилган «дўзах»ни кўришади

«Халқаро легион»

Ўтган ой ҳужум бошланганида Зеленский россияликларга қарши украиналиклар билар бир сафда курашадиган «халқаро легион» яратиш учун хорижликларни очиқдан-очиқ таклиф қилган.

Кўнгиллилар ўз мамлакатларидаги Украина элчихоналарида ариза топширишлари мумкин эди.

Улар орасида канадалик собиқ пиёда аскар Хантер Френсис ҳам бор.

«Бунга қарор қилиш ҳам керак эмас эди. Бу қилиш зарур бўлган вазифа эди. Бу тўғри иш», деб айтган Янги Брунсвикдаги Eel Ground First резервациясидан бўлган 24 яшар йигит.

«Бундай бўлиши мумкин эмас. 21 асрда бир мамлакат тўлиқ босиб олинмаслиги керак», деб айтган у AFP нашрига.

Ўқ ўтказмайдиган нимча, қулоқчинлар ва омон қолиш тўплами каби зарур нарсалар билан рюкзагини тўлдирган Френсис Варшавага 6000 км масофага учиб борган.

Польша пойтахтида мактабдаги дўстидан ёрдам олган. У Френсис учун меҳмонхонада жой олган ва Украина чегарасига бўлган йўлнинг бир қисмигача етказиб қўйган.

У ерда Френсис Лвов ва Киевга кетишдан аввал гуманитар кўмак марказида ёрдамчи бўлишни режалаштирмоқда.

Чегарани кесиб ўтганидан кейин унга Украина тасмаси ва қурол-яроғ берилади.

Унинг чегарадан ўтишини Польша ва бошқа мамлакатлардан келаётган ўнлаб хорижий жангчиларга ёрдам берган полшалик ўқ отиш бўйича йўриқчи Ян Плевка мувофиқлаштиради.

«Мен жанг қилиш бўйича тажрибага эга эмасман, аммо кўп машқ қилганман», деб айтган Френсис. «Шундан фойдалана оламан, деган умиддаман.»

«Уларга кўп одам келиб қўшиляпти. Уларга кўп қурол олиб келишяпти. Улар биз келтирган тўпламларга эга бўлишяпти. Мен тарқатишим мумкин бўлган бир талай дори-дармонлар бор», деб айтган у.

«Бу ерда бўлишнинг ўзи билан уларга маънавий кўмак берамиз.»

Британиялик депутатнинг ўғли

Британиялик бир гуруҳ собиқ хизматчилар, жумладан депутатнинг ўғли ҳам россияликларга қарши жанг қилиш ниятида Украинага етиб келган.

Беш йил давомида Қиролликнинг денгиз десантчиси сифатида хизмат қилган 30 яшар Бен Грант дам олиш кунлари Украинага етиб келган етти нафар британиялик собиқ аскарлар сафида бор эди, деб хабар беради Guardian нашри.

Унинг онаси Хелен Грант консерватив депутат, собиқ вазир, шунингдек бош вазир Борис Жонсоннинг қизлар таълими бўйича махсус вакили.

Бент Грант уч нафар фарзанд отаси. Унинг сўзларига кўра, Ироқда хавфсизлик соҳасида хусусий пудратчи сифатида хизмат қилиб қайтгач, кетиш олдидан онасини хабардор қилмаган.

Львов темир йўллари бекатида Киевга кетаётган поездга чиқишдан аввал Guardian нашрига берган интервьюсида у телевизорда Украинада бомба тушган уйни кўргани ва фонда бақираётган бола овозини эшитганидан кейин кетишга аҳд қилганини айтади.

«Жами 100 киши келяпти, улар ҳаммаси бу ерга етиб келганида жуда яхши бўлади, улар турли соҳалардан, айримлари жуда яхши мутахассислар», деб айтган Грант.

Фуқаролик кўнгиллилари фаоллашмоқда

Украинанинг мунтазам қуролли кучларига минтақавий мудофаа кучлари вакиллари ҳам кўмаклашмоқда, уларнинг кўпчилиги 2014 йилда кўнгиллилар қуролли кучлари гуруҳлари сафида Украина шарқидаги россияпараст айирмачиларга қарши жанг қилган.

«Душман тактикаси 2014-2015 йиллардаги урушдан бери ўзгармаган. Ягона фарқ биз энди «кичкина яшил одамчаларга» қарши курашмаяпмиз», деб айтган 45 яшар кўнгилли Назар Золтар, низода айирмачилар сифатида ҳаракат қилган россиялик махсус кучлар вакилларини назарда тутиб.

Ҳозир улар очиқдан-очиқ россияликлармиз дейишади, деб айтган у.

Золтарга кўра, Украинада эса кўп нарса ўзгарган.

«Армиямиз анча илғор ва профессионал тайёргарликка эга», деб айтган у. «Биз кўнгиллиларда ҳам мақсад бир. Ватанимизни ҳимоя қиляпмиз. Борадиган бошқа еримиз йўқ. Уйимизга келиб буйруқ беришларига йўл қўймаймиз

Кўнгилли шифокор, 28 яшар Наталия Лобага кўра, у низода иштирок этишни режалаштирмаган.

Аммо унинг қадрдон Гостомел шаҳри бомбардимон қилинганидан кейин, фикридан қайтган.

«Бу урушда иштирок этишга мажбур бўлдим», деб айтган у. «Уруш кимга ҳам ёқарди? Кимгаям керак у?»

«Аммо ўзлари нацистлардек ҳаракат қилиб, сени нацист деб атаганидан кейин ҳеч нима қилмай туришнинг иложи қолмайди», деб айтган Лоба. «Тўлиқ тиббий таълим олмаганман, аммо биринчи ёрдамни кўрсата оламан. Ҳозир шу билан шуғулланяпман.»

Сизга мақола ёқдими?

Фикрлар 1

Сиёсат * Мажбурий 1500 / 1500

Ватникларни [руслар] қиришга тайёр бўлганлар кўп

Жавоб бериш