![14 март куни Россиянинг «Биринчи» канали ўзгача фикрловчи ходимасининг Останкино телестудиясига киргани ва энг кўп томоша қилинадиган янгиликлар кўрсатуви вақтида «Йўқолсин уруш» плакатини кўтариб чиқиб, Москванинг Украинадаги ҳарбий ҳаракатини қоралашини компьютер орқали кўраётган эркак. Бошловчи Екатирина Андреева Беларус ҳақидаги лавҳани бошлаши билан қўлда ёзилган плакатни кўтариб, урушни қоралаган Марина Овсянникова экранда кўриниш берган. [AFP]](/cnmi_ca/images/2022/03/15/34519-000_32672d7-739_416.webp)
МОСКВА – Душанба (14 март) куни Россиянинг энг кўп томоша қилинадиган янгиликлар кўрсатувини эфирга узатиш чоғида норози ходима қўлига «Йўқолсин уруш» деб ёзилган постерни ушлаб олиб студияга кирган ва Москванинг Украинадаги ҳарбий ҳаракатини қоралаб чиққан.
Бу ҳодиса жуда кучли назорат остидаги давлатга қарашли «Биринчи» канал хавфсизлигининг ноодатий бузилиши бўлди. Унинг байроқдор «Время» дастури Совет давридан бери соат кечки соат 9 да эфирга узатилади ва миллионлаб одамлар, айниқса катта ёшдаги россияликлар томонидан томоша қилинади.
Мухолифат намойишларини кузатиб борувчи «ОВД-инфо» порталига кўра, бу аёл Биринчи каналда муҳаррир бўлиб ишлаган Марина Овсянниковадир.
Бошловчи Екатерина Андреева Беларус билан муносабатлар ҳақидаги лавҳани бошлаши билан Овсянникова «Йўқолсин уруш» деб қўлда ёзилган баннерни кўтарган ҳолда экранда кўриниш берган.
![13 март куни Москва полицияси Россиянинг Украинадаги ҳарбий ҳаракатларига қарши намойишга чиққан аёлни қўлга олди. [AFP]](/cnmi_ca/images/2022/03/15/34521-000_32628xn-739_416.webp)
13 март куни Москва полицияси Россиянинг Украинадаги ҳарбий ҳаракатларига қарши намойишга чиққан аёлни қўлга олди. [AFP]
Постернинг пастки қисмида, рус тилида: «Урушни тўхтатинг. Ташвиқотга ишонманг. Бу ерда сизни алдашяпти», инглиз тилида эса «россияликлар урушга қарши», деб ёзилган эди.
1998 йилдан бери бошловчилик қиладиган Андреева баланд овозда гапириб уни тўсишга ҳаракат қилган бир вақтда намойишчи аёл рус тилида бир-икки ибора, жумладан «Урушни тўхтатинг!» деб айтишга ҳам улгурган.
Шундай сўнг эфирга шифохона ҳақидаги лавҳа берилган.
«Манқуртлашган россияликлар»
Кейинроқ Овсянникова 14 соат давомида сўроқ қилинганини айтди. Сешанба куни Москванинг Останкино туман суди уни маъмурий ҳуқуқбузарликда айблаб, 30 минг рубл (280 АҚШ доллар) миқдоридаги жаримага тортган.
Владимир Путин ахборот муҳитини бўғиб борар экан Россияда ҳақиқатни топиш тобора қийинлашиб бормоқда.
4 март куни имзоланган «Сохта янгиликлар» ҳақидаги аёвсиз қонун расмий Кремлнинг қарашларига зид бўлган хабарларни жиноятга тенглаштирилади, эҳтимолий қамоқ муддати 15 йилгача бўлиши мумкин.
Кремлпараст ОАВда ишловчи айрим журналистлар воқеаларни қандай ёритиш борасида чегараланганликлари ва айниқса «босқин» сўзидан фойдаланиш тақиқлангани ҳақида хабар беришган.
«ОВД-инфо» Овсянникова отаси украиналик, онаси рус эканлиги ва икки мамлакатнинг урушишини хоҳламаслигини айтган видеони жойлаштирган.
«Афсуски, сўнгги йилларда Биринчи каналда фаолият юритдим ва Кремл ташвиқотини олиб бордим, энди эса бундан уяламан», деб айтган у.
«Телеэкранлардан ёлғон сўзланганимдан уяламан. Мен россияликларни манқуртлаштиришга йўл қўйганимдан уяламан», деб қўшимча қилган у.
«Буларнинг бари эндигина бошланаётган 2014 йилда сукут сақладик», деб айтган у Москванинг Қримни босиб олиши ва Украинадаги россияпараст айирмачиларни қўллаб-қувватлаганини назарда тутиб.
«Кремл Алексей Навалнийни заҳарлаганида намойишга чиқмадик. Бу ғайриинсоний режимни кузатишда давом этдик. Энди эса бутун дунё биздан юз ўгирди.»
Воқеа акс этган видео ижтимоий тармоқларда тезлик билан тарқаган, кўплаб фойдаланувчилар мухолифатга қарши қаттиқ босим олиб борилаётган бир вақтда аёлнинг «ноодатий жасоратини» олқишлаганлар.
Овсянникованинг жасоратини олқишлаган ижтимоий тармоқ фойдаланувчилари уни қўллаб-қувватлашмоқда.
«Жасоратинг ва инсонпарварлигининг учун ташаккур», деб ёзган Facebook саҳифасида россиялик Виктория Шерстобитова.
«Қани энди шундай одамлар кўпроқ бўлса! Бу ноадекват маразматикни тўхтатиб қолган бўлар эдик!», одессалик Настена Сластена.
«Нақадар жасоратли! Ҳақиқат ва яхшилик доим ғалаба қозонади, бу жуда ҚИММАТГА ТУШАДИ, аммо ҒАЛАБА ҚОЗОНАДИ», деб ёзган украиналик Юлия Бабич.
«Тинчлик учун кураш»
24 феврал куни Украинага босқин бошланганидан бери Россияда минглаб намойишчилар ҳибсга олинган.
Россия мухолифати етакчиси Навалний қамоқхонадан туриб россияликларни урушга қарши намойишни давом эттиришга чақирган. У Россия «қўрқоқлар миллати» бўлмаслиги кераклигини айтаркан, Путинни «митти подшоҳ» деб атаган.
У Россия ва Украинага ҳужум қилиши учун аскарларнинг ўтишига рухсат берган Беларус халқини ҳар иш куни кечки соат 7 да, дам олиш ва байрам кунлари кундузги соат 2 да асосий майдонларда намойишга чиқишга чақирди.
«Мен ҳаммани кўчага чиқишга ва тинчлик учун курашга чақираман», деб айтган у 2 март куни Facebook саҳифасида ёзиб қолдирган баёнотида. У россияликларни қамоққа тушишдан қўрқмасликка чақирган.
«Урушнинг олдини олиш учун қамоқхоналар ва полиция машиналарини тўлдиришимиз керак, биз қамоқхоналар ва полиция машиналарини тўлдирамиз.»
«Ҳамма нарсанинг баҳоси бор, 2022 йил баҳорида ўша баҳони тўлашимиз керак.»
2020 йилда Кремл қилган деб айблаган, Новичок асабни фалажловчи моддаси ёрдамидаги ҳужумдан кейин 2021 йилнинг бошида Навалний Россияда Путинга қарши сўнгги йиллардаги энг йирик намойишга етакчилик қилган.
Навалнийга яқин бўлган Леонид Волков ўзининг Twitter саҳифасида унинг ҳаракати иштирокчилари Овсянниковага солинадиган ҳар қандай жаримани «тўлашга тайёр» эканлигини ёзган.
