Карвонсарой
Жиноят ва адолат

Россиянинг Украинага босқини учун аскар ёллаган сурияликлар Европа Иттифоқи санкцияларига учради

Карвонсарой ва AFP

25 март куни Дамашқда Россия ва Сурия байроқлари билан безалган машина Сурия президенти Башар Асаднинг Россия президенти Владимир Путин билан қўл бериб кўришгани акс этган баннер ёнидан ўтиб кетмоқда. [Луай Бешара/AFP]

25 март куни Дамашқда Россия ва Сурия байроқлари билан безалган машина Сурия президенти Башар Асаднинг Россия президенти Владимир Путин билан қўл бериб кўришгани акс этган баннер ёнидан ўтиб кетмоқда. [Луай Бешара/AFP]

БРЮССЕЛ – Пайшанба (21 июл) куни Европа Иттифоқи (ЕИ) Россиянинг Украинага босқинига ёрдам бериш учун аскар ёллашда айбланган 10 нафар Сурия фуқаросини қора рўйхатга киритди.

24 феврал куни Россия ўз қўшнисига ҳужум бошлаган эди.

Европа Иттифоқининг санкциялар рўйхатига ушбу сурияликларнинг исмлари бирга иккита хусусий қўриқлаш компанияси ҳам киритилди ва 27 аъзодан иборат блокнинг расмий журналида чоп этилди.

Қора рўйхатга тушганлар орасида Cham Wings авиакомпаниясининг эгаси, Сурия президенти Башар Асаднинг яқин иттифоқчиси бўлган Иссам Шаммут ҳам бор.

13 апрел куни россиялик ҳарбийлар томонидан уюштирилган саёҳат чоғида олинган суратда рус аскарлари Украинанинг Счастье шаҳридаги Луганск электр станциясини қўриқламоқда. [Александр Неменов/AFP]

13 апрел куни россиялик ҳарбийлар томонидан уюштирилган саёҳат чоғида олинган суратда рус аскарлари Украинанинг Счастье шаҳридаги Луганск электр станциясини қўриқламоқда. [Александр Неменов/AFP]

Сурияда ҳаракат қилаётган россиялик ёлланма аскарлар, ижтимоий тармоқларда тарқалган сурат. [Файл]

Сурияда ҳаракат қилаётган россиялик ёлланма аскарлар, ижтимоий тармоқларда тарқалган сурат. [Файл]

Cham Wings АҚШ санциялари остига тушган.

Армия полковниги Солиҳ ал-Абдуллоҳ Сурияда Россия кучлари билан бирга ҳаракат қилган ўзининг 16-бригадасидан Украинадаги жанглар учун аскар ёллаганликда айбланмоқда.

Сурия режими қўлловидаги ва фақат Сурияда фаолият юритувчи Фаластин озодлик армияси қўмондони Муҳаммад ал-Салтий Украинада Россия кучлари сафида жанг қилиш учун фаластинлик қочқинларни ёллаш билан шуғуллангани айтилмоқда.

Икки хусусий қўриқлаш ширкати – Sanad Protection and Security Services ва «ИШИД овчилари» деб номланувчи шўъба корхонасини бошқарадиган Al-Sayyad Company for Guarding and Protection Services ҳам санкцияларга дучор бўлган.

Sanad Россиянинг Вагнер гуруҳи хусусий хавфсизлик компанияси томонидан назорат қилинади ва Россиянинг Суриядаги бизнес манфаатларини, жумладан, нефт, газ ва фосфат қазиб олиш объектларини қўриқлайди, дейилади Европа Иттифоқи баёнотида.

Al-Sayyad компанияси ҳам Вагнер гуруҳига алоқадор бўлиб, «Ливия ва Украинага суриялик ёлланма аскарларни ёллаш фаолиятида» айбланган.

Сўнгги йилларда Сурияда аксарияти хорижий кучларга алоқадор бўлган хусусий хавфсизлик компаниялари кўпайган.

Хусусий компанияларнинг қўриқлаш хизматларини кўрсатиши ҳамда пул маблағлари, транспорт воситалари ва алоҳида шахсларни қўриқлаши одатий ҳол бўлса-да, Сурия мисолида бу компаниялар ўз мақсадларини кўзловчи давлатлар ва субъектлар учун дарвозага айланди.

Ёлланма аскарлар Россиянинг урушини авж олдирмоқда

24 февралда бошланган босқиндан кўп ўтмай, Россия қўшинлари сафида жанг қилиш учун Украинага суриялик ёлланма аскарлар оқиб кела бошлади.

Суриядаги манбаларга кўра, уларни ўқитиш ва ташиш Сурияда жойлашган Россия кучлари, Вагнер гуруҳи ва Ал-Сайёд компанияси томонидан амалга оширилган.

«Сурияликлар ҳақиқат ва адолат учун» ташкилоти манбаларининг Ал-Машариқ нашрига маълум қилишича, март-апрел ойларида Украинадаги урушда Россия сафида жанг қилиш учун Суриядан 500 нафар аскар ёлланган.

Янги ёлланма аскарлар 25 кишидан иборат кичик гуруҳларда Россиянинг Латакия вилоятидаги Хмеймим базаси орқали Украинага олиб кетилган.

Сурия режими хавфсизлик хизматлари Россия қуролли кучларига аввал Суриянинг жангари гуруҳлари ёки қуролли кучлари сафида россиялик зобитлар назорати остида урушган, шаҳар шароитида жанг олиб бориш тажрибасига эга кўнгиллиларни аниқлашга ёрдам берган.

Вагнер гуруҳининг 20000 га яқин ёлланма аскари, жумладан Сурия ва Ливиядан бўлганлар Украинадаги Россия кучларига ёрдам берган, деди апрел ойида Европа расмийси.

Украинадан ташқари, Россиянинг ёлланма аскарлари Сурия, Венесуэла, Судан, Марказий Африка Республикаси, Мали, Ливия, Чад ва Мадагаскарда ҳам бор.

«Вагнер келиб, мамлакатни янада беқарорлаштиради, минерал ресурсларни талайди ва кетишга қарор қилишдан олдин қўлдан келганича пул ишлашга ҳаракат қилади», деган эди март ойи бошида АҚШ Ҳарбий денгиз кучларининг Африкадаги махсус операциялар қўмондонлиги раҳбари Милтон Сэндс Washington Post нашрига.

«Мамлакат ночорроқ, заифроқ, ҳимоясизроқ бўлиб қолади. Ҳар сафар.»

Украинадаги қурбонлар сони ортмоқда

Украинада қурбонлар сони ортар экан, Вагнер гуруҳи янги ёлланма аскарларга тобора муҳтож бўлиб бормоқда.

АҚШ ва Британия разведка хизматлари раҳбарларига кўра, Украинага беш ойдан бери давом этаётган босқинда 15 мингга яқин россиялик ҳалок бўлган. Президент Владимир Путин кутилганидан кўра кўпроқ йўқотишларга учрагани айтилади.

Британиянинг МИ6 ташқи разведка хизмати бошлиғи Ричард Мур пайшанба куни 15000 та қурбон «эҳтимол консерватив баҳо экани» ва тезкор ғалабани кутган Путин учун «жуда талафотли» бўлганини айтган.

АҚШ разведкасининг баҳолашича, Россия тарафидан «15 мингга яқин одам ҳалок бўлган ва бундан уч марта кўпроқ одам яраланган», деди Марказий разведка бошқармаси раҳбари Билл Бернс бир кун аввал сўзлаган нутқида.

Қурбонлар сони ортар экан, Россия Яқин Шарқ ёшларини ўз урушлари учун тўп еми сифатида ишлатишда, Украинага қарши ҳужумда Сурия ва турли Африка давлатларидан келган ёлланма аскарлардан фойдаланишда айбланмоқда.

Кузатувчиларнинг таъкидлашича, бундай стратегия рус аскарлари учун хавфни минималлаштириш ва Россиянинг ичида тартибсизликларнинг олдини олиш учун россиялик қурбонлар сонини камайтиришга қаратилган.

Ёллаш жараёнида пул катта рол ўйнайди, деб баёнот берган Украинага юборилган суриялик ёлланма аскарлар қариндошларининг гувоҳликлари ва суҳбатларини ёзиб олган Суриянинг «Ҳақиқат ва адолат учун» нодавлат ташкилоти.

Манбаларга кўра, ёлланма аскарлликка ёзилган кўплаб сурияликлар пулга жуда муҳтож, бироқ, айрим маълумотларга кўра, Россиянинг тўлов қобилияти ишончсиз бўлиб қолган ва бундан кейин ҳам шундай бўлиб қолиши эҳтимоли катта.

Сизга мақола ёқдими?

Фикрлар 3

Сиёсат * Мажбурий 1500 / 1500

Сурияда ҳозир нималар бўлаётганини тасаввур қилиш қўрқинчли, чунки биз қайси воқеалар ҳамманинг диққат марказида эканини биламиз. Қочишга улгурмаган ёки мамлакатда қолган қочқинлар – ҳозир у ерда нима бўлаётганини Худо билади.

Жавоб бериш

Энг муҳими, улар айланиб ўтиш йўлларини топишмасин, чунки улар доимо шундай қилишади. Бирор нарсани эътиборга олишни унутиб, сўнг аввалги каби ўз манфаатлари йўлида фойдаланадилар.

Жавоб бериш

«Россиянинг Украинага босқини учун аскар ёллаган сурияликлар Европа Иттифоқи санкцияларига учради» – буни ўқиш жуда ёқимли.

Жавоб бериш