Украиналик партизанлар россиялик босқинчиларнинг режаларини барбод қилмоқда

КИЕВ – Украинанинг партизанлик ҳаракати ишғол қилинган ҳудудларда фаолиятини кучайтирмоқда, ўқ-дорилар омборларини вайрон қилмоқда, кўприкларни портламоқда, москвапараст амалдорларга суиқасд қилиб, урушдаги ролини оширмоқда.

Охирги ойларда Украинанинг Москва назорати остидаги ҳудудларида Россия кучлари томонидан тайинланган бир қанча амалдорлар ҳужумлар натижасида ҳалок бўлган ёки жароҳатланган.

Ана шундай ҳодисаларнинг бирида 6 сентябр куни Запорожье вилояти Бердянск шаҳрининг кремлпараст ҳарбий коменданти Артем Бардин кетаётган автомобил портлаган.

Бардин олган жароҳатлари туфайли вафот этган.

Кремл томонидан тайинланган Бердянск йўл полицияси бошлиғининг ўринбосари Александр Колесников 26 август куни машинасининг портлаши оқибатида ҳалок бўлган.

«Аниқ билганимиз шуки, Херсон ва Запорожье вилоятларининг босиб олинган ҳудудларида 19 та [россиялик] коллаборант ўлдирилган... бундай рақамлар тизимли ёндашувдан далолат беради», дейди Украина хавфсизлик хизматининг (СБУ) собиқ ходими, ҳозирда «Украина келажак институти» мустақил таҳлил маркази мутахассиси Иван Ступак Карвонсаройга.

Партизанлар нафақат россияпараст амалдорлар ва коллаборантларни, балки руслар фойдаланаётган муҳим ҳарбий объектларни ҳам нишонга олмоқда, деди у яқинда Мелитополда вайрон қилинган темирйўл кўпригини мисол келтириб.

Кўприк вайрон қилиниши натижасида руслар босиб олинган Қримдан ҳарбий машиналар олиб ўтиш имкониятини йўқотди, деди Ступак.

Қаршилик ҳаракати Украина ҳарбийларининг зарба бериши учун уларга стратегик нишонларнинг географик координаталарини узатиш каби бошқа бошқа вазифаларни ҳам бажармоқда, деб қўшимча қилди у.

«Қримдаги бу портлашлар... Буларнинг бари Украина қаршилик ҳаракатининг иши. Улар координаталарни беришади, қолган ишни эса ҳарбийларимиз бажаради», деди Ступак.

«Қаршиликнинг ишида ҳеч қандай тартибсизлик йўқ. Ҳозирда ҳаммаси 90% назорат остида», деди у.

«Тегишли ҳудудлардаги одамларга муайян топшириқлар берилмоқда. Қурол, пул, алоқа воситалари, логистика билан таъминланади. Маълум муддатда бажариш керак бўлган топшириқлар ҳам бор», деб қўшимча қилди Ступак.

«Ҳозирда руслар икки тарафдан босимга дуч келишмоқда – Украина аскарлари ташқаридан босим қилмоқда, партизанларимиз эса ичкаридан».

«Руслар суткада 24 соат, ҳафтада 7 куни доимий стресс ҳолатида. Бундай танг вазиятда улар эртами-кечми синади», деди Ступак.

Россиянинг режалари барбод бўлмоқда

Қаршилик фаолиятининг асосий йўналишларидан бири психологик урушдир.

Сўнгги ойларда украиналик исёнчилар руслар cохта референдум ўтказишни режалаган жойларни белгилашда украинча «i» ҳарфидан фойдаланган. Шунингдек, улар биноларни кўк-сариқ рангга бўяшади.

Улар ишғол қилинган шаҳарларда турли варақалар тарқатиб, Украина байроқларини илиб қўйишган.

Украина партизанлар гуруҳларини кенг кўламли босқин бошланишидан аввал тузган эди. Ҳозир эса партизанлар ҳаракати кучайиб бормоқда, дейди Украина Хавфсизлик ва ҳамкорлик маркази директори Сергей Кузан Карвонсаройга.

«Украина вилоятларига қарайдиган бўлсак, энг кучли партизанлик ҳаракати Запорожье ва Херсон вилоятларида жойлашган», деди Кузан.

«Қримдаги ҳаракат у қадар кучли эмас, чунки саккиз йилдан бери оккупация қилиб келинган. Аммо, у ердаги халқ анча профессионал ва қатъиятли», деб қўшимча қилган у.

Кузанга кўра, Украина махсус кучлари томонидан мувофиқлаштирилган ҳаракатнинг асосий мақсади – россияликларга маънан босим ўтказиш.

«Масалан, «Босқинчи огоҳ бўл, сен ўзга юртдасан», деб ёзилган флаер. Биз буни ҳис қила олмасмиз, аммо бу душманга кучли руҳий таъсир ўтказади.»

«Россияликларнинг ўзлари бу ерда бегона эканликларидан қариндошларига шикоят қилишмоқда. Улар ўзларини ишончсиз ҳис қилишмоқда», деб айтган у.

«Ахборот фронтида яна битта мақсадимиз бор. Зобитлар ва қурол-аслаҳаларни йўқ қилиш учун шарқ ва жанубдаги, жумладан Қримдаги россияликларнинг марказлари жойлашувини аниқлаштириш», деб қўшимча қилган Кузан.

Ўсиб бораётган имкониятлар

«Жангчиларимизнинг ташаббускорлиги кишини ҳайратга солади. Улардан ҳатто ғарбликлар ҳам ҳайратда», дейди Кузан.

«Қандай қилиб портловчи қурилмалар жойлаштириш, қўпорувчиликни амалга ошириш ёки пистирмадан ҳужум қилишни ҳамма ҳам билмайди», деб айтган Кузан. «Табиийки, бундай одамлар, махсус тайёргарликдан ўтган ҳақиқий Жеймс Бондлар кам. Аммо кўпчилик хабар етказиб, босқинчиларнинг режаларини бузади. Буларнинг ҳаммаси келишилган ҳолда амалга оширилади», дейди Кузан.

Илк бор 2014 йилда ҳужумга учраганидан бери Украина узоқ вақт давомида қаршилик ҳаракатини ривожлантирган.

Диверсантларнинг иши уларга қарши жанг қилишга сезиларли кучини сарф қилаётган россияликларни жиддий чалғитади, дейди ташкилотчига айланган украиналик собиқ партизан Владимир Жемчугов.

Жемчугов 2014 йилда Луганскда қаршилик ҳаракатига асос солган ва Россия ҳарбий кучларини йўқ қилишга қаратилган 30 га яқин муваффақиятли операцияларни амалга оширган.

Шундай операциялардан бирида у икки қўли ва қисман кўриш қобилиятини йўқотган, бир йилга яқин Россияда ҳибсда ушлаб турилгач, Украина ҳукумати уни иккита россиялик зобитга алмаштирган.

У Украина қаҳрамони унвонига эга. Айни пайтда Украина шимоли ва жанубидаги қаршилик кучлари фаолиятини мувофиқлаштириш билан шуғулланмоқда.

«Шарқ ва жанубдаги ёшлар ҳозир фаоллик билан қаршилик ҳаракатига қўшилмоқда», деди у Карвонсаройга.

«Улар Украина назоратидаги ҳудудда жанговар тайёргарликдан ўтадилар, кейин эса уйларига, ҳозирда ишғол қилинган жойларга қайтадилар», деди у.

«Ҳарбий ўтмишга эга эмаслиги ва ҳеч қандай рўйхатларда йўқлиги сабабли уларни топиш мушкул», дейди Жемчугов.

«Телефон – партизанлар учун автоматдан ҳам хавфлироқ қурол», деб қўшимча қилди у.