Украина кучлари яқинлашгани сари Қримда яширин қаршилик ҳаракати кучаймоқда

КИЕВ – Украина кучлари ярим оролга яқинлашар экан, Россия томонидан босиб олинган Қримда Украинани қўллаб-қувватловчи яширин кучлар фаоллашмоқда, дейди кузатувчи ва расмийлар.

Россия Қримни 2014 йилда ноқонуний равишда аннексия қилган.

«Украинага тегишли Қрими озодликка яқинлашгани сайин, қаршилик шунчалик кучаймоқда», деди Киевдаги Қрим автоном республикаси ва Севастопол шаҳри прокуратураси матбуот котиби Катерина Диденко Карвонсаройга.

«Қримда ҳали ҳам Россия режимини, босқинчи ҳокимиятни қўллаб-қувватламайдиган одамлар борлигини унутманг. Улар Украинани кутяптилар», дейди Диденко.

2022 йилнинг февралида Россия Украинага кенг кўламли босқин бошлаганидан буён бу ерда сезиларли қаршилик аломатлари кузатилган.

Босқин бошланганига бир йил тўлиши муносабати билан олинган ва Қрим партизанлари томонидан юритиладиган Телеграм каналига жойлаштирилган суратда Севастопол марказидаги Графлик пристани мажмуасига тунда ўрнатиб кетилган Украина байроғи акс этган.

Эътиборли томони шундаки, Графлик пристани Россия Қора денгиз флотининг муҳим қисмидан бевосита бир кўрфаз нарида жойлашган.

Қримдаги яширин ҳаракатлар қуролли қаршиликка тайёрланаётганини ҳам эълон қилган.

Шундай гуруҳлардан бири бўлган «Атеш» Калашников автоматлари билан қуролланган фаоллар Жанкойда экани ва қаршилик кўрсатиш учун замин ҳозирлаётгани акс этган видеони ўзининг Телеграм каналига жойлаган.

Гуруҳ аъзоларнинг видеода айтишича, уларда аллақачон портловчи моддалар, қурол ва ўқ-дорилар сақланувчи ўнлаб пана жойлар бор.

«Энди биз ортимиздаги темир йўлни миналаштирмоқчимиз. Украина қуролли кучлари Қрим билан маъмурий чегарани кесиб ўтиши билан биз ҳукумат бинолари ва ҳарбий объектларни эгаллаб оламиз», дейди жангчилардан бири видеода.

«Фаоллашув»

«Босқинчилар тўққиз йил ичида Қримни ўз ҳудудларига тўлиқ қўшиб олганликларини айтмоқда, аммо аслида ундай эмас», деди Украина президенти Владимир Зеленскийнинг Қримдаги доимий вакилининг ўринбосари Денис Чистиков Карвонсаройга.

«Қримдаги қаршилик ҳаракати кучаймоқда», деди у.

Чистиковнинг сўзларига кўра, Қримда айбланувчиларга нисбатан «Россия армиясини обрўсизлантириш» учун қўзғатилган жиноий ишлар сонининг кўпайгани қаршилик кучайиб бораётганининг бир белгисидир.

Украина рамзларининг намойиши билан боғлиқ бундай ҳолатлар қонун кучга кирган 2022 йил мартидан бери 270 тани ташкил этган.

«Ҳозир Қримда ўз фаолиятини фаол тарғиб қилаётган учта қаршилик ҳаракатини биламиз», деди Чистиков.

Учта гуруҳ ичида нисбатан янгироғи бўлган «Атеш» нафақат Қримда, балки Россияда ҳам операциялар олиб боради. Унинг асосий фаолияти Россиянинг сафарбарлик ҳаракатларига қарши қаратилган бўлиб, гуруҳ тактикаси саботаж амалиётларини ўз ичига олган.

Қолган икки ташкилот – «Қрим жанговар чайкалари» ва «Сариқ лента» асосан Украинани қўллаб-қувватловчи материаллар тарқатиш, босиб олинган шаҳарларда сариқ-кўк ленталар осиб қўйиш ва Украина кучларига Россиянинг муҳим ҳарбий объектлари координаталарини тақдим этиш орқали ахборот кампанияларини олиб боради.

Чистиковнинг таъкидлашича, «Сариқ лента»нинг 5000 тача обуначиси бор.

«Эҳтимол, улар сиз ҳеч ҳам ўйламаган одамлар бўлиши мумкин. Босқинчилар бу ташкилотлар аъзоларининг оккупацион ҳукумат идоралари таркибида бўлиши мумкинлигидан қўрқади», деди у.

«Улар тунда [деворлар ва бошқа юзаларга] Украина байроқларини чизиб, объектлар устига ҳақиқий байроқларни ўрнатадилар, эрталаб эса ҳеч ким шубҳаланмайдиган оддий одамларга айланишади», дейди Россия-Украина уруши фахрийси, заҳирадаги майор ва ҳарбий таҳлилчи Алексей Гетман Карвонсаройга.

«Бу жуда хавфли. Улар қўлга тушиб қолса, ҳеч қандай суд ўтказилмаслигини биламиз – уларни шунчаки отиб ташлашади. Улар – ҳақиқий қаҳрамонлар», деди у.

«Россия ҳар қанча уринмасин, яширин гуруҳларни йўқ қила олмаяпти», деди матбуот котиби Диденко.

«Яриморол Россия разведкаси ва ҳуқуқ-тартибот идораларига тўлиб кетганини ҳисобга олсак, бу жуда жасоратли иш ва Россия бу қаршиликдан чинакам қўрқади», деди у.

Яқинлашиб келаётган жанг

Яширин ҳаракатларнинг фаоллашуви Қрим аҳолисининг Россия режимидан унчалик қўрқмаётгани ва тез орада Украина қуролли кучларининг ярим оролни озод қилиш бўйича операция бошлашини кутаётганидан даракдир.

«Ушбу ҳаракатларнинг координаторлари ҳозирда ўз фаолларини назорат остида ушлаш кераклигини айтмоқдалар, чунки улар янада радикал ва тажовузкорроқ ишларни қилишга тайёр, аммо буларнинг бари ўз вақтида амалга оширилиши керак», деди Чистиков.

Рус босқинчилари ҳам жангга тайёрланмоқда.

«Руслар ҳозир Қримда хандақлар қазиб, мудофаага ўтишга ҳозирланмоқда», деди Гетман.

«Биз Армянск ва Нова Каховкада нималар бўлганини кўрдик», деди у 2022 ва 2023-йилларда Қримдаги Россия ҳарбий объектларида содир бўлган портлашларни назарда тутиб.

«Бошқача қилиб айтганда, улар Қримнинг исталган нуқтасига етиб бора оладиган қуролларимиз борлигини билишади, шунинг учун у ерда руслар учун хавфсиз жойнинг ўзи йўқ».

«Россиялик ҳарбийлар ўз оилаларини яширинча эвакуация қила бошлаганидан аллақачон хабаримиз бор. Улар буни яширинча қилишяпти, чунки уларнинг раҳбарлари буни ёқламайди... лекин аскарлар секингина ўз аёллари, болалари ва ота-оналарини Россия ҳудудига эвакуация қилишмоқда», деди Гетман.

Қрим бўйлаб ўрнатилган Украина байроқлари эса психологик таъсирни янада кучайтирмоқда, деб қўшимча қилди у.