ВАШИНГТОН – АҚШ Марказий разведка бошқармаси (МРБ) катта пул мукофотлари эвазига россияликларни шифрланган алоқа тармоғи орқали ўз мамлакатлари сирларини ошкор қилишга ундаш саъй-ҳаракатларини кучайтирмоқда.
Душанба (15 май) куни Марказий разведка бошқармасининг янги Телеграм каналида (https://t.me/SecurelyContactingCIA) эълон қилинган видео орқали идора президент Владимир Путин давридаги вазиятдан норози одамларнинг муносабатини билишга уринмоқда.
Қисқа видеолавҳада россиялик мансабдор шахс ҳамда уйдаги болали аёлнинг ҳар иккови ўз шароитидан хавотирда экани ва ҳаёти ўзи орзу қилгандекми, деган саволни бераётгани акс этган.
Видеода баён қилинишича, одамлар вазиятни яхшилаш учун чора кўра олиши – АҚШ разведка идорасига маълумот тақдим этиши ва шунда ҳам Россия ватанпарвари бўлиб қолиши мумкин.
Яқинда Телеграмда Марказий разведка бошқармаси томонидан эълон қилинган видеодан лавҳа.
Видео ва унга илова қилинган матнда яширин тармоққа («дарквеб») орқали Tor браузери ва Марказий разведка бошқармасига айтганидек, уларнинг ҳимоясини таъминловчи шифрлаш воситаларидан фойдаланган ҳолда бу ишни қандай амалга ошириш кераклиги тушунтирилган.
Марказий разведка бошқармаси билан қандай боғланишни ушбу Телеграм каналда кўриш ёки бу ердан Тор браузерини юклаб олиб, қуйидаги манзилни киритиш мумкин:
ciadotgov4sjwlzihbbgxnqg3xiyrg7so2r2o3lt5wz5ypk4sxyjstad.onion
Ҳақиқат
«Марказий разведка бошқармаси Россия ҳақидаги ҳақиқатни билмоқчи, биз эса бу ҳақиқатни айта оладиган ишончли одамларни қидиряпмиз», дейилади идоранинг Телеграм каналида.
«Сизнинг маълумотларингиз сиз ўйлагандан ҳам қимматлироқ бўлиши мумкин.»
Марказий разведка бошқармаси разведка, дипломатия, фан-техника, шунингдек, бошқа соҳаларда тажрибаси ёки контактлари бор одамларни алоқага чиқишга чақирмоқда. Идора барча турдаги, жумладан, сиёсий раҳбарлар ва иқтисодиётга оид маълумотлар билан қизиқмоқда.
Марказий разведка бошқармаси яширин тармоқ орқали маълумот сиздиришнинг оддий, аммо тушунарли усули эҳтиёткор россияликларни кейинги қадамни қўйишга ишонтирамиз, деб умид қилмоқда.
«Мақсадимиз – уларнинг биз билан боғланиши учун имкон қадар хавфсиз усулларни тақдим этиш», дейди идора расмийларидан бири AFPга.
Унинг таъкидлашича, Қўшма Штатлар қўзғолон ёки ҳукумат тўнтариши келтириб чиқармоқчи эмас, аммо айрим россияликларнинг буни ўз мамлакатларининг олдинга силжишига ёрдам сифатида кўришига умид қилмоқда.
Ҳозирда Россияда блокланган бошқа ижтимоий тармоқлардаги шунга ўхшаш тарғибот ишлари ўз натижасини берди, деб қўшимча қилди расмий.
«Биз билан боғланинг», дейди МРБ. «Эҳтимол, атрофингиздаги одамлар ҳақиқатни билишни истамас. Биз буни истаймиз.»
