БИШКЕК – Ўтган йилда Қирғизистонда болаларга нисбатан жинсий тажовуз билан боғлиқ ҳолатларнинг ошгани аниқланди. Бу ҳақда чоршанба, 26 февраль куни мамлакат ички ишлар вазири ўринбосари Курсан Асанов ижтимоий масалалар, таълим, фан, маданият ва соғлиқни сақлаш бўйича парламент қўмитасига маълум қилди, деб хабар беради 24.kg нашри.
Қирғизистонда 2017 йилда болаларнинг жинсий таҳқирланиши билан боғлиқ 151 та ҳолат аниқланган. 2016 йилда бу рақам 110 тани ташкил этганди. Асанов ўтган йилги ҳолатлардан 121 таси судга йўналтирилганини қўшимча қилди.
Асановнинг сўзларига кўра, 80 фоиз ҳолларда жиноят боланинг яқинлари тарафидан содир этилган.
