БЕРЛИН, Германия – Тожикистоннинг Германиядаги элчиси Маликшо Неъматов 5 март, душанба куни Тожикистон миллий музейи (ТММ) билан ҳамкорликни муҳокама қилиш учун Берлин этнологик музейига ташриф буюрди. Бу ҳақда чоршанба, 7 март куни AsiaPlus.tj нашри хабар тарқатган.
Неъматов билан учрашган Берлин музейининг этномусиқашунослик бўлими директори Ларс-Кристиан Кох музей тожик рассомлари ва халқ ҳунармандларининг асарларини намойиш этишга тайёр эканини билдирди, деб хабар беради Тожикистон ТИВ.
Неъматов Кохга 2018 йил Тожикистонда туризм ва халқ ҳунармандчилигини ривожлантириш йили деб эълон қилинганини айтиб, Германия музейига чакан каштаси намунасини туҳфа қилди.
