ОЛМАОТА – Ҳуқуқ-тартибот идоралари Олмаотада қозоғистонлик фигурист Денис Тенни пичоқлаганликда гумон қилинган шахсни қўлга олди, деб хабар берди жума, 20 июль куни Озод Европа/Озодлик радиоси (RFE/RL) олмаоталик прокурор Берик Жуириктаевга асосланиб.
25 яшар Тен 19 июль, пайшанба куни Олмаотада машинасининг ён ойналарини ўғирлашга уринган икки шахсга қаршилик кўрсатган вақтда бир неча бор пичоқланган. У олинган жароҳатлар туфайли касалхонада вафот этган.
Ички ишлар органлари Жамбил вилоятидан бўлган, 1994 йилда туғилган Нурали Қиясовни ҳибсга олган, деди Жуириктаев жума куни. У гумондорнинг ўз айбига иқрор бўлганини қўшимча қилган.
Олмаота ички ишлар бошқармаси берган хабарга кўра, иккинчи гумондорнинг ҳам шахси аниқланган бўлиб, айни вақтда у қидирилмоқда.
Тен 2014 йилда бўлиб ўтган Сочи олимпиадасида бронза медали совриндори бўлган. Бу билан у олимпиадада медаль олган илк қозоғистонлик фигурали учувчи бўлган эди. Ижтимоий тармоқларда бутун дунёдан кўплаб спортчилар уни мақтовлар билан ёд этганлар.