OSTONA – Ostonada 30-iyun va 1-iyul kunlari “Ko‘chmanchilar olami” deb nomlangan ko‘chmanchilik madaniyati xalqaro festivali bo‘lib o‘tdi. Festivalda ko‘chmanchilar madaniyati va o‘yinlari namoyish etildi.
Qozog‘iston, Qirg‘iziston, Turkiya, Ukraina, Vengriya, Bolgariya hamda Rossiyaning Boshqirdiston va Yoqutiston respublikalaridan kelgan 8 nafar guruh festivalda ishtirok etdi. Festival Ostona Qozog‘iston poytaxti deb e’lon qilinganining 20 yilligi bayramiga to‘g‘ri keldi.
Tashkilotchilarga ko‘ra, festival 2008-yildan beri Vengriyada o‘tkazib kelinayotgan Turkiy xalqlarning Buyuk qurultoyiga asoslangan.
Ishtirokchilar turli ko‘chmanchilik o‘yinlari bo‘yicha o‘z mahoratlarini namoyish qildilar, chavandozlik, kamondan o‘tish bo‘yicha mahorat saboqlarini o‘tib, ko‘chmanchi qabilalar taomlari, musiqasi va hunarmandlik mahsulotlarini taqdim etdilar.
Qozog‘iston bosh vaziri matbuot xizmatining xabar berishicha, “Etno-ovul” milliy madaniy majmuasida o‘tgan festivalga taxminan 5 ming kishi tashrif buyurgan.
“Hammasi juda ajoyib bo‘ldi – chavandozlar, musiqa, milliy liboslar va taomlar”, deydi ostonalik 17 yashar Yengeniya Soy.
“Markaziy Osiyodagi turli millatlar vakillari bir-birlari bilan muloqotga kirishib, do‘stona munosabatda bo‘lishi va iliq hissiyotlarni ulashishi mumkinligini ko‘rish maroqli”, dedi u Karvonsaroy nashriga. “Tomoshabinlar juda mamnun bo‘lishdi, menga ham yoqdi!”