“Sputnik”ning fitnali maqolasi Rossiyaning Markaziy Osiyoda vahima uygʻotishga qaratilgan navbatdagi xatti-harakati sifatida baholanmoqda

TOSHKENT – Rossiyaning “Sputnik” yangiliklar sayti oʻquvchilarni adashtirish hamda AQSH va Markaziy Osiyo davlatlari oʻrtasiga adovat solishga qaratilgan maqolalarni chiqarishda davom etmoqda.

Rossiya ommaviy axborot vositalarining Tolibonlar va “Islom davlati” (ID) bilan qoʻrqitishga harakat qilib kelishi anchadan beri hammaga maʼlum. Yaqinda esa ularning AQSH bilan “qoʻrqitish”ga urinishi fosh boʻldi.

“Markaziy Osiyo AQSH maxsus xizmatlarining hujumiga uchraydi” deb nomlangan vahimali maqola “Sputnik-Oʻzbekiston” saytida 7-fevral kuni chop etildi.

Maqola Rossiyadagi Afgʻon urushi faxriylari uyushmasining raisi – Frans Klintsevich bilan suhbatni oʻz ichiga olgan boʻlib, u AQSH tarafidan “Rossiya” uchun paydo qilinayotgan “muammolar” postsovet mamlakatlariga ham taʼsir qilishini aytgan.

“Yaqin kelajakda Markaziy Osiyo mintaqasi jiddiy hujumlarga uchraydi. Bu hozirgi kunda AQSH maxsus xizmatlari tomonidan Rossiyaga qarshi tayyorlanayotgan hujumlardir”, deb aytgan u “Sputnik-Oʻzbekiston” nashri bilan suhbatda. Urush faxriysi bu bilan goʻyoki Amerika kuchlari Markaziy Osiyo mamlakatlariga hujum qilish uchun afgʻonistonlik jangarilarni tayyorlayotganiga “ishora” qilgan.

“Bu hujumlar, eng avvalo Markaziy Osiyo mamlakatlariga qaratiladi. AQSH tomonidan shakllantirilayotgan bu taktika esa yutqiziqsizdir”, deb aytgan u.

“Jirkanch maqola”

Ushbu maqolaga eʼtibor qaratgan Oʻzbekiston tashqi ishlar vaziri Abdulaziz Kamilov Markaziy Osiyoga nisbatan asossiz xavflar tilga olingani bois uni “jirkanch” deb atagan.

Kamilov maqola chiqqan kunning ertasiga – 8-fevral kuni jurnalistlar oldida chiqish qilgan. U 19-20 fevral kunlari Toshkenda oʻtgan “Markaziy Osiyodagi oʻzaro mushtaraklik: tahdidlar va yangi imkoniyatlar“ nomli anjumanga tayyorgarlik doirasida uyushtirilgan tadbirda nutq soʻzladi.

U jurnalistlarga “Markaziy Osiyo jangarilar hujumidan vayron boʻladi” degan gap-soʻzlarni 25 yildan beri eshitib kelishini aytdi.

Vazir “Sputnik” nashri maqolasidan iqtibos keltirar ekan, Tolibonlarning Markaziy Osiyoga suqilib kirish niyatida ekanini isbotlovchi dalillar yoʻqligini taʼkidladi.

“Markaziy Osiyo mamlakatlarining hujumga uchrashi haqidagi bu daʼvolar naqafat norozilik keltirib chiqaradi, balki kishining gʻazabini ham qoʻzgʻaydi”, deb aytgan Kamilov Gazeta.uz nashrining 8-fevral kungi xabariga koʻra.

“Bu Oʻzbekistonda rasmiy shaxs tarafidan “Sputnik” maqolasiga eʻtiroz bildirilishi bilan bogʻliq ilk holatdir. Fikrimcha, nashr tahririyati bundan toʻgʻri xulosa chiqarishi va oʻzining tashviqot “joʻmragini” yopishi kerak”, deydi oʻzbekistonlik jurnalist Bobur Alalov Karvonsaroy bilan suhbatda.

“Mamlakatdagi xorijiy muxbirlarni aynan Oʻzbekiston TIV akkreditatsiyadan oʻtkazishini unutmaslik lozim”, dedi Alalov.

Tashqi ishlar vazirligi saytidagi maʼlumotlarga koʻra, bugungi kunda Oʻzbekistonda “Sputnik” nashrining 3 nafar muxbiri roʻyxatdan oʻtgan.

Yolgʻon vahima

Bu Kreml nazoratidagi ommaviy axborot vositalarining boʻrttirma tahdidlar, jumladan ID terrorchilik guruhi bilan qoʻrqitish orqali Oʻzbekistondagi mushtariylarni adashtirishi bilan bogʻliq birinchi holat emas.

Kreml nazorati ostidagi “Russkaya vesna” sayti oʻtgan yilning 16-may kuni “Qonli toʻqnashuv xavfi: IDning 5000 jangarisi Oʻzbekistonda” sarlavhali maqolani chop etgandi.

Maqolada Oʻzbekiston tashqi ishlar vaziri oʻrinbosari Abdujabbor Abduvohidov tomonidan oʻsha vaqtdagi AQSH elchisi Pamela Spratlenga yuborilgani iddao qilingan soxta maktub haqida soʻz boradi.

Oʻzbekiston rasmiylari mamlakatda IDning birorta jangarisi yoʻqligini aytib, maqolaning soxta ekanligini fosh qilganlar. Oʻzbek ommaviy axborot vositalari Rossiyadagi OAVni Oʻzbekistonda informatsion qoʻporuvchilik harakatlari bilan shugʻullanmaslikka” chaqirganlar.

Afgʻoniston rasmiylari mamlakat shimolida ID kuchlari jiddiy hozirlikka ega emasligini taʻkidlaganlar, deb yozgan edi 13-fevral kuni uzjournal.uz nashri.

“Shimol (Markaziy Osiyo) mamlakatlari uchun xavotirga oʻrin yoʻq. Badashxonda IDning jangovar kuchlari borligi haqidagi xabarlar asossiz.” deb aytgan “Shahin” Afgʻoniston milliy armiyasi 209-korpusining axborot xizmati vakili Muhammad Hanif Rizoiy.

“Sari Pul va Juzjon viloyatlarida ular butunlay tor-mor etilgan”, degan u.