OLMAOTA – 13-dekabr kuni Olmaotada giyohvand moddalar savdosidan olingan pullarni legallashtirishga qarshi kurash boʻyicha bir haftalik mashgʻulotlar yakunlandi, deb xabar berdi Yevropada xavfsizlik va hamkorlik tashkiloti (YXHT) oʻz bayonotida.
Simulyatsiya mashqlari Markaziy Osiyoda giyohvandlik vositalari, psixotrop moddalar va ularning prekursorlari noqonuniy aylanmasiga qarshi kurash boʻyicha mintaqaviy axborot-muvofiqlashtirish markazida (CARICC) oʻtkazildi.
Ishtirokchilar orasida janubiy viloyatlardan kelgan 20 ga yaqin ichki ishlar, prokuratura va Qozogʻiston moliyaviy monitoring qoʻmitasi xodimlari, shuningdek xususiy sektor vakillari bor edi.
Real vaqt rejimida oʻtkazilgan jonli simulyatsiya mashqlari giyohvand moddalar savdosidan olingan pullarni legallashtirishga oid ishlarni tergov qiladigan va jinoiy javobgarlikka tortadigan huquqni muhofaza qilish idoralari xodimlari uchun moʻljallangan.
Ishtirokchilar onlayn-vositalari noqonuniy faoliyatni yashirishda qoʻllanishi mumkin boʻlgan xususiy sektor subyektlari bilan hamkorlikning oʻziga xosliklari bilan ham tanishdilar.
Terrorchilar va ularning hamtovoqlari muntazam ravishda giyohvand moddalar savdosi va pul yuvish amaliyotlaridan foydalanishi hech kimga sir emas.
Ishtirokchilar narkobiznes bilan shugʻullanuvchi transmilliy guruh aʼzolari rolini ijro etgan professional aktyorlar ishtirokidagi videolavhani tahlil qildilar.
Xalqaro darajadagi murabbiylar
Ishtirokchilarning oʻquv mashqlari davomidagi ishi mashgʻulotni ishlab chiqishda qatnashgan Belarusь va Birlashgan Millatlar Tashkilotining Giyohvand moddalar va jinoyatchilik boʻyicha byurosi mutaxassislari tomonidan baholandi.
YXHT tadbiri AQSHning Nur-Sultondagi elchixonasi, Bosh prokuratura huzuridagi huquqni muhofaza qilish akademiyasi va CARICC bilan hamkorlikda tashkil etildi.
Trening YXHTning “samarali boshqaruvni qoʻllab-quvvatlash, pul yuvish va terrorizmni moliyalashtirishga qarshi kurash, shuningdek, onlayn vositalardan foydalangan holda giyohvand moddalarning noqonuniy aylanishi va savdosiga qarshi kurashish” boʻyicha bir necha yilga moʻljallangan choralari doirasida oʻtkazildi.