Qozoq teleoperatori Rossiya kanallarini oʻchirdi, tomoshabinlar bu qarorni olqishlamoqda

OLMAOTA – Mamlakatning eng yirik kabelli televideniye kompaniyasi boʻlgan “Almatel Qozogʻiston” narxlarning oshib ketgani sababli Birinchi kanal va Rossiyaning boshqa telekanallari retranslyatsiyasini toʻxtatdi.

Qozogʻistonliklarning koʻpchiligi bu qarorni olqishlagan.

“Alma TV” brendi ostida ishlaydigan “Almatel Qozogʻiston” kompaniyasi matbuot xizmatining maʼlum qilishicha, kanallarning olib tashlanishiga narxlarning asossiz ravishda koʻtarilgani sabab boʻlgan.

Forbes.kz onlayn nashriga koʻra, “Raqamli TV oilasi”ning (“Sifrovoye telesemeystvo”) retranslyatsiya narxlari bir necha yil davomida faqat oshib borayotgan edi, deb bayonot bergan “Alma TV”.

“2020-yilgi hamkorlik uchun narx huquq egasi/distribyutori tomonidan hech qanday asoslarsiz, avtomatik ravishda belgilangan”, deyiladi xabarda.

“Alma TV” Rossiya telekanallariga oʻtgan yilgi shartlarini saqlab qolish iltimosi bilan murojaat qilganini, ammo ijobiy javob olmaganini bildirdi.

“Retranslyatsiya huquqi narxining oshishi koʻrsatiladigan televizion xizmatlar narxiga bevosita taʼsir qiladi va bu yakuniy mijozga ziyon keltiradi. Kompaniya bunga yoʻl qoʻya olmaydi”, deyiladi “Alma TV” bayonotida.

“Tashviqotdan boshqa narsa emas”

Rossiya kanallari koʻpchilik tarafidan Kremlning jarchilari sifatida talqin qilinadi.

Rossiya ommaviy axborot vositalarining qozoq auditoriyasiga nisbatan oʻta kuchli taʼsiri axborot xavfsizligi nuqtai nazaridan koʻngilsiz oqibatlarga olib kelishi mumkin, deydi Qozogʻiston jurnalistlar ittifoqi raisi, olmaotalik Seytqazi Matayev .

“Rossiya kanallari Qozogʻistonda Kremlning qarashlarini targʻib qiladi, bu har doim ham Qozogʻiston manfaatlariga mos kelmaydi”, dedi u.

Ijtimoiy tarmoqlardagi qozogʻistonliklar Rossiya kanallarining televizorlardan gʻoyib boʻlishidan mamnun ekanliklarini bildirdilar.

Forbes nashrining Facebook sahifasida chop etilgan bu yangilikka munosabat bildirganlarning deyarli barchasi Rossiya kanallarining oʻchirilishini olqishlagan.

“Rossiya kanallarini koʻrmaganman, koʻrmayman va koʻrmoqchi ham emasman. Faqat yolgʻon, adovat, xusumat va nafrat urugʻini sochishadi”, deb yozadi Aidyn Ken.

“Eng toʻgʻri qaror! Qozogʻiston Respublikasi hududida “Rossiya24”ni ham oʻchirish kerak”, deb yozgan boshqa bir foydalanuvchi Jandos Temirgali.

“Barakalla! Hamma Rossiya kanallarini oʻchirish kerak. Ular tashviqotdan boshqa narsa emas”, deydi Aymurat Kojakov ismli foydalanuvchi.

Oʻtgan oyda Rossiya davlat ommaviy axborot vositalari dunyo boʻylab koronavirusning tarqalish sabablari haqida aksilgʻarb xabarlarni yoyinlashda ayblangan, ijtimoiy tarmoqlardagi Kremlga aloqador akkauntlar keyingi kunlar va haftalar davomida bu xabarlarni tarqatishda davom etgandi.

Rossiya OAVga ishonsizlik

Rossiya OAVga ishonchsizlik borasida qozogʻistonliklar yolgʻiz emas.

Karvonsaroy tomonidan 2018-yilda oʻtkazilgan soʻrovnomaga koʻra, Markaziy Osiyo aholisining deyarli yarmi “Sputnik” va RT kabi Rossiya OAVga ishonmasligi maʼlum boʻlgan .

2018-yilning aprel oyi davomida olib borilgan “Sputnik va RT kabi Rossiya OAVga ishonasizmi?” deb nomlangan Karvonsaroy soʻrovnomasida 758 kishi ishtirok etgan.

Oʻquvchilar orasida 264 kishi (34%) “ha”, 377 tasi (48%) “yoʻq”, 63 nafari (8%) “mavzuga bogʻliq” va 58 oʻquvchi (7%) “Men RT yoki “Sputnik” haqida eshitmaganman” deb javob bergan, 23 (3%) odam “bilmayman” degan javobni tanlagan.

Asosiy javoblar – 51% Qozogʻistondan, 17% Oʻzbekistondan, 8% Qirgʻizistondan, 4% Tojikistondan va qolgan 20% Markaziy Osiyo va boshqa mamlakatlardagi turli proksi-serverlardan olingan.

Oʻtgan yil iyul oyida Londonda OAV erkinligiga bagʻishlangan global konferentsiyada Rossiyaning RT va Sputnik axborot agentliklarining ishtiroki taqiqlangan edi , bunga ularning “faol ravishda dezinformatsiya tarqatgani” sabab boʻlgan, deb xabar bergan edi oʻsha vaqtda Britaniya tashqi ishlar vazirligi.

Kanada bilan hamkorlikda tashkil etilgan yigʻilishda 60 ta vazir, 1000 nafar jurnalist va fuqarolik jamiyati aʼzolari ishtirok etganlar.