Xitoy elchisining odamlar ustidan yurib oʻtishi shov-shuv keltirib chiqardi

KIRIBATI – Tinch okeanida joylashgan kichik orol davlatidagi Xitoy elchisining shu haftada internet boʻylab tarqab ketgan surat va videolari keng omma tanqidiga uchradi. Ijtimoiy tarmoqlar foydalanuvchilari buni “xavotir uygʻotuvchi” va “Xitoyning qarzdorlarni nima qilishini koʻrsatuvchi” holat deya taʼriflaganlar.

Xitoy elchisi Tan Songen orol davlat boʻlmish Kiribatiga shu oy boshida tashrif buyurgan. Uning tashrifi chogʻida olingan fotosuratda elchining yerda yuztuban yotgan yosh yigitlar ustidan yurib oʻtayotgani aks etgan. [Fayl]

“Biror mamlakat elchisining (umuman, biror bir katta odamning) bolalar ustidan yurib oʻtishini hech qanday holatda maqbul deb boʻlmaydi. Lekin, biz Xitoyning Kiribatidagi elchisi nima qilganini koʻrib turibmiz”, deb yozgan orol davlatidagi AQSHning harbiy attashesi, qoʻmondon Konstantin Panayiotu oʻz Tvitterida.

Koʻpchilik kuzatuvchilarga koʻra, bu manzara Pekinning mamlakatga nisbatan taʼsir qamrovini ifodalaydi.

Xitoy investitsiyalari va taʼsiri kuchayib borar ekan, oʻtgan yil sentabr oyida Kiribati hukumati kutilmaganda Taypey (Tayvan) bilan diplomatik munosabatlardan voz kechib, Xitoyga yuzlangan edi.

Shuningdek, Kiribati oʻz orollarining birida Pekinning harbiy-dengiz bazasi qurish iltimosini qondirishi va bu bilan Xitoyning ekspansiyaga oid rejalari uchun yoʻl ochishi yuzasidan xavotirlar kuchaygan.

Payshanba (20-avgust) kuni oʻz elchisini himoya qilib chiqqan Xitoy rejimi bu – Tinch okeanidagi orol-davlat uchun madaniy jihatdan maqbul marosim ekanini taʼkidlagan.

Avstraliyaning amaldagi oliy komissari Bryus Kauld biror marta bu kabi marosimda ishtirok etmagan, dedi seshanba (18-avgust) kuni orolning urf-odatlari bilan yaxshi tanish boʻlgan Avstraliyaning Tinch okeanidagi idorasi rahbari.

Qarzdor mamlakatlar vaziyatni kuzatmoqda

Pekinning taʼsiri ostidagi davlatlarda yashovchi odamlar bunday “ajib” manzaradan mamnun emaslar.

Markaziy Osiyoda aksilxitoy kayfiyati kuchayishdan toʻxtagani yoʻq, zero Pekin mintaqaning mahalliy aholisi hisobidan oʻzining iqtisodiy va geosiyosiy maqsadlarini amalga oshirishga intilmoqda.

Markaziy Osiyo mamlakatlari siyosiy, iqtisodiy, ijtimoiy va sogʻliqni saqlash sohalarida mislsiz boʻhronlarga sabab boʻlgan koronavirus pandemiyasiga qarshi kurashayotgan bir paytda, Xitoy iqtisodiyoti pandemiyadan ancha oʻnglangandek koʻrinmoqda va buning bir qator belgilari paydo boʻlgan – yaqinda COVID-19 vatani boʻlish Uxandagi tomoshada minglab xitoyliklarning niqobsiz va ijtimoiy masofani saqlamay ishtirok etganini koʻrsatuvchi fotosuratlardan Pekinning allaqachon inqirozdan chiqayotganini taxmin qilish mumkin.

Bunday nomutanosiblik qudratga toʻla Xitoyning pandemiya taʼsirida zaiflashgan Markaziy Osiyo mamlakatlarini ekspluatatsiya qilishiga imkon bermoqda va kuzatuvchilarga koʻra, Pekin aynan shunday yoʻl tutmoqda.