MOSKVA – Seshanba, 31-iyul kuni Moskva viloyatining Zelenograd shahrida qirg‘izistonlik mehnat muhojirlaridan biri noma’lum shaxslar tomonidan kaltaklanganidan besh kun o‘tib, hayotdan ko‘z yumgan. Bu haqda Farg‘ona News axborot agentligi 3-avgust kuni qirg‘iz diasporasi rahbarining Facebook sahifasiga asoslanib xabar tarqatgan.
42-yashar Anarbek Omurjanov ochiq havoda farzandlari bilan dam olayotgan paytda bir necha kishi unga hujum qilib do‘pposlagan, dedi “Qirg‘iz birligi” diaspora tashkiloti qo‘mitasining vitse-prezidenti Ulan Koshmatov.
Omurjanov voqea joyida bo‘lganlar tomonidan chaqirilgan tez yordam mashinasida kasalxonaga yetkazilgan. U 5 kun jonlantirish bo‘limida yotib, hayotdan ko‘z yumdi.
Politsiya voqea yuzasidan tergov boshlagan bo‘lsa-da, hozircha hech kimni hibsga olmagan.
Rossiyada Markaziy Osiyolik mehnat muhojirlariga nisbatan diskriminatsiya ko‘p hollarda zo‘ravonliklarga sabab bo‘lmoqda.