VORUX, TOJIKISTON – Tojikiston prezidenti Emomali Rahmon va uning qirgʻizistonlik hamkasbi Sooronbay Jeyenbekov juma (26-iyul) kuni Tojikistonning Vorux qishlogʻida boʻlib, hududdagi tanglikni hal etish yuzasidan muzokara oʻtkazdilar, deb xabar beradi Ozod Yevropa / Ozodlik radiosi.
Prezidentlar hududdagi qirgʻiz va tojik aholisi bilan yaqin muloqotda boʻldilar. Muzokaralar Isfara (Tojikiston) va Choʻlpon-ota (Qirgʻiziston) shaharlarida davom etishi kutilmoqda.
Chegaradagi qurolli toʻqnashuvlar tufayli dushanba (22-iyul) kuni bir tojik fuqarosi halok boʻlgan. Natijada Qirgʻiziston hukumati Ak-Sal qishlogʻidan 650 kishini evakuatsiya qilgan.
Markaziy Osiyoda sovet diktatori Iosif Stalin tomonidan “boʻlib tashla va hukmronlik qil” tamoyili asosida belgilangan chegaralar tufayli tez-tez nizolar yuz berib turadi.