Қозоғистонда «Z-қўшиқчи» концерти бекор қилинди, Ўзбекистонда эса бойкотга чақириқлар янграмоқда

ОЛМАОТА – Қозоғистонликлар кремлпараст қўшиқчи Григорий Лепснинг Олмаота вилоятидаги Қўнаев шаҳрида 8 июл кунга белгиланган концертининг бекор қилинишига эришдилар.

Лепс Россиянинг Украинага босқинини қўллаб-қувватлаган. У ва унга ўхшаган санъаткорлар «Z-артистлар» номи билан машҳур – босқинчи Россия кучлари автомобиллар, реклама баннерлари ва бошқа кўргазмали воситаларда «Z» логотипини ишлатган.

«Григорий Лепснинг чиқиши учун ўз концерт майдонини таклиф қилган «Makao Luxury Village Resort» концерт ташкилотчилари билан шартномани бир томонлама бекор қилишга қарор қилди», деб маълум қилган курорт 19 июн куни аввалроқ сотиб олинган чипталар харид жойига қайтарилиши мумкинлигини қўшимча қилиб.

Афтидан, бу қарорга Қозоғистон фуқаролари ва расмийлари таъсир кўрсатган.

«Ажойиб янгилик! Лепснинг концерти бекор қилинди», деб ёзди Олмаота шаҳар кенгаши депутати Еркин Ракишев ўша куни Facebook саҳифасида.

«Бугун эрталаб фаол Канат Турдалиев билан шу масала юзасидан Олмаота вилояти раҳбарияти билан учрашиб, вазиятни мураккаблаштирмаслик учун одамларнинг хоҳиш-истакларини бажаришга чақирдик», деди у. «Куч бирликда!»

«Баракалла!»

Ижтимоий тармоқ фойдаланувчилари бу қарорни олқишлаган.

«Улар тўғри қилишди, акс ҳолда мен Лепсни шахсан жазолаш учун Капчағайга борган бўлардим», деб ёзади чимкентлик Facebook фойдаланувчиси Алеке Лашкерули Ракишевнинг постига қолдирилган изоҳларда.

«Баракалла! Душманни қувиб чиқардик», деб қўшимча қилган остоналик Болат Жугунис.

Лепснинг ғазабнок менежери Владимир Урюпин Қозоғистонни «русофобик бурчак» деб атаган.

«Бекор қилишса қилаверишсин. Жин урсин уларни. Қўрқинчли жойи йўқ. Қозоғистонсиз ҳам кунимиз ўтади. Биз мамлакатимизни қўллаб-қувватлашни давом эттирамиз ва ғалаба бизники бўлиши учун қўлимиздан келганини қиламиз», деди Урюпин Россиянинг «Газета.ру» сайтига берган интервьюсида.

Қозоғистон халқи «ақлдан озибди», деб қўшимча қилди у.

«Биз Қозоғистонда ишламаганмиз ва ишлаш ниятимиз ҳам йўқ. Дўстона бўлмаган мамлакатларга бормаймиз. АҚШ ва шунга ўхшаш давлатларга ҳам. Душманларимиз бизга қандай муносабатда бўлса, биз ҳам уларга шундай муносабатда бўламиз», дейди Урюпин.

Бироқ қозоғистонлик фаоллар Урюпиннинг «русофобия»га оид айбловларини рад этмоқда.

«Биз русларга қарши эмасмиз. Биз Украинадаги урушни қўллаб-қувватлаётганларга ва айниқса, уни молиялаштираётганларга қаршимиз», дейди «Уйғон, Қозоғистон» ёшлар ҳаракати фаоли, олмаоталик Олжас Бексултанов.

Урюпинга ўхшаганлар босқинга қаршиликни аксилроссия кайфияти билан аралаштиришга ҳаракат қилади, деб қўшимча қилди у.

Бу фикрни 21 июн куни Семейда Россия агрессиясини кескин қоралаган «Би-2» гуруҳи ҳеч қандай тўсиқсиз концерт бергани ҳам тасдиқлайди.

Рок-мусиқачилар концертдан тушган маблағни шу ой бошида Абай вилоятидаги ўрмонларни қамраб олган йирик ёнғинлардан жабрланган оилаларга хайрия қилишган.

Россияда расмийлар турли баҳоналар билан «Би-2» концертларини бекор қилган, гуруҳнинг ўзи Россия президенти Владимир Путинни қўллаб-қувватлаб чиқишдан бош тортади.

Z-қўшиқчилар

Бошқа томондан, Лепс тинчликсеварлик ва Путинга қарши кайфият ҳукмрон бўлган Қозоғистонда исталмаган шахсга айланиш учун ҳамма нарса қилди.

Лепс Россиянинг Украинадаги «махсус ҳарбий операцияни» қўллаб-қувватлади ва Кремл ўз ички аудиторияси олдида урушни оқлаш ва ташвиқот қилиш учун мунтазам равишда фойдаланадиган машҳур шахсга айланди.

Масалан, феврал ойида Лепс ва бошқа Z-артистлар ташвиқот митингида оммани «қиздириб», Путиннинг «муҳим нутқи» олдидан ватанпарварлик қўшиқларини ижро этишган.

Июн ойи ўрталарида эса Санкт-Петербург халқаро иқтисодий форумидаги «Россия медиа гуруҳи» кечасида Лепс ҳамда унинг ҳамкасблари Николай Басков ва «Земляне» рок-гуруҳи раҳбари Владимир Киселев Украина танкини йўқ қилган ҳар бир рус аскарига 1 миллион рубл (тахминан 12 минг доллар) хайрия қилишга тайёр эканликларини билдиришган.

«Биз ўз ишимизни қиляпмиз. Улар [Украинадаги рус аскарлари] ўз ишини бажаряпти. Тирик эканмиз, жангчиларимизга ёрдам беришда давом этамиз», деган эди Лепс ўшанда.

Лепснинг ушбу «сиёсий акцияси» Қозоғистонда норозиликка сабаб бўлди. Фаоллар унинг мамлакатга келишига кескин норозилик билдириб, агар концерт бекор қилинмаса, уни бузишга ваъда беришди.

«Уят!»

Ижтимоий тармоқларда эмоциялар авжига чиққан.

«Уялинглар! Сиз украиналикларнинг қотиллигига шериксизлар...», деб ёзди 16 июн куни қозоғистонлик мустақил журналист Динара Егеубаева Facebook саҳифасида. «Мен ҳаммани ушбу Z-артистнинг концертини бекор қилишни талаб қилишга чақираман. Украинани вайрон қилиш учун бизнинг чўнтагимиздан бир тийин ҳам сарфланмаслиги керак.»

Жамоат арбоби Арман Шораев Лепснинг усулини қўллаб, Z-артистнинг Қўнаев шаҳридаги концертини бузган ҳар бир кишига 1 миллион тенге (2200 доллар) тўлаб беришни ваъда қилган.

Энди эса мукофот пулини тўлашга ҳожат ҳам қолмаган.

Шораев Лепс концертининг бекор қилинишини ўзининг принципиал позициясини билдирган Қозоғистон жамоатчилигининг ғалабаси деб атади.

«Лепсга ўхшаганлар ва Россия тажовузини қўллаб-қувватловчиларнинг ҳеч бири қозоқлардан меҳмондўстлик кутмасин», деди у ваъда қилинган 1 миллион тенге хайрияга йўналтирилишини қўшимча қилиб.

Бу Қозоғистонда Z-артистлар концертларининг бекор қилиниши билан боғлиқ биринчи ҳолат эмас.

Кўпгина мамлакатлар Путин урушини қўллаб-қувватлаган россиялик юлдузларнинг концертларини рад этгач, уларнинг кўпчилиги Қозоғистонни кўзлай бошладилар, аммо бу фойда бермади.

Қўшиқчилар Лариса Долина ва Полина Гагаринанинг кремлпарастлиги ошкор бўлиши биланоқ фаоллар уларнинг концертларини, шунингдек, Z-актёр Сергей Глушко иштирокидаги шоуни бекор қилишга эришдилар.

Ўзбекистондаги #BoycottLeps

Ўзбеклар ҳам босқинни қўллаб-қувватлашини ошкора тан олган «Z-артистларнинг» жонли чиқишларида иштирок этиш истагини билдиргани йўқ.

Жорий йилнинг бошида «Жара» халқаро мусиқа фестивали минтақада ўзи учун жой топа олмади.

Дастлаб Озарбайжондан Қозоғистонга, сўнг Ўзбекистонга кўчирилган «Жара» халқаро мусиқа фестивали «дунёдаги мавжуд вазият» билан боғлиқ расмий сабаб билан «номаълум муддатга қолдирилган».

Аммо Марказий Осиёдаги кўпчилик учун тадбирнинг бекор қилиниш сабаби аниқ: у ҳам бўлса, Кремлнинг Украинага босқинини очиқ қўллаб-қувватлаган «Z-артистлар»нинг иштирокидан жамоатчиликнинг нафратидир.

Ҳозирда Ўзбекистондаги фаоллар ижтимоий тармоқлар орқали Лепснинг октябр ойида Тошкентда ўтиши режалаштирилган концертини бекор қилиш чақириқларни ёйинламоқда.

Блогер Мирзо Зоминий қўшиқчи Путиннинг қонли урушини қўллаб-қувватлашини айтиб, ўзининг Телеграм-каналида #LepsKerakmas хештеги билан кампания бошлади.

Ўзбекистон Z-артистлар босқинчилар учун пул ишлаб берадиган жойга айланмаслиги керак, дейди у.

«Ўзбеклар, қонхўр машина ёқилғи билан таъминланишига йўл қўйманг!» деб хитоб қилган Зоминий ўз ватандошларига.