Путин эҳтимолий ядровий қирғиндаги россиялик «жафокашлар» ҳақида ҳазил қилди

Ядровий қурол оқибатида дунё бўйлаб миллионлаб одамларнинг ҳалок бўлиши Россия президенти учун ҳазил мавзуга айланди.

Карвонсарой ва АFP

2018-10-19

Россия президенти Владимир Путин Кремлда янги тайинланган хорижий дипломатлардан ишонч ёрлиқларини қабул қилмоқда, Москва, 11 октябрь. (Сергей Карпухин/AFP)

Ядровий уруш юз берган тақдирда россияликлар шаҳид сифатида «жаннатга» тушадилар, деди Путин пайшанба, 18 октябрь куни.

Путин мамлакат жанубидаги Сочи шаҳрида бўлиб ўтган халқаро мутахассислар форумида чиқиш қиларкан, Россияга эҳтимолий ядровий урушнинг қурбони ўлароқ таъриф берди.

«Бундай вазиятда бизга нисбатан ядровий қурол қўлланилиши тайин, аммо биз ундан фойдаланмаймиз», деди у.

«Тажовуз қилаётган томон қасос муқаррар эканини ва у йўқ қилинишини, биз эса тажовуз қурбони, шаҳидлар сифатида жаннатга тушишимизни англаши керак», деди у.

11-17 сентябрь кунлари Россия Трансбайкал ҳудудидаги Цугол машғулотлар майдонида совуқ уруш давридан бери биринчи марта «Восток-2018» деб номланган энг йирик ҳарбий машғулотларни ўтказди. (Кремль)

«Улар шунчаки ўлиб кетадилар, чунки уларда тавба қилиб олиш учун вақт бўлмайди», деди у залдан янграган кулгуга жавобан.

Путиннинг нутқи ҳам Кремль назоратидаги, ҳам мухолифатчиларга тегишли оммавий ахборот воситаларида кенг ёритилди. Янгиликларни кузатган россияликлар унинг сўзларига бирдек нафрат ва истеҳзо билан фикр билдиришган.

Айрим блоггерларга кўра, Путин биринчи маротаба «жаннат» ва «шаҳидлар» каби диний тушунчаларни тилга олган, бошқалар эса «унинг гапларида маъно йўқлиги» ва худди «экстремист» каби гапирганини айтиб ўтишган.

«Россия Ислом давлатига ҳуш келибсиз», деди россиялик журналист Карина Орлован «Эхо Москвы» сайтида чоп этилган «Аллоҳу акбар, россияликлар» деб номланган блогида. «Россия фуқаролари энди худкуш бош қўмондон (Путин) яратган қўлбола портловчи мосламанинг кичик қисмлари.»

«У худди ядро бомбаси бор Гитлерга ўхшайди», деди «astlire» тахаллусли ўқувчи.

«Россия ҳукумати қўл остида ўтказаётган ҳаётимиздан кўра ўлганимиз афзал, қанча тез бўлса, шунча яхши», деди «par9» тахаллусли ўқувчи yaplakal.com сайтида.

Март ойида Путин янги «кўринмас» қуролни эълон қилган ва бу қурол Ғарбнинг мудофаа тизимини кучсизлантиришини айтган эди. Мазкур даъво мудофаа таҳлилчилари ва кузатувчилар томонидан ҳақиқатдан йироқ ва сиёсий мақсадларга эга деб кўрилган эди.

2016 йилда у Россиянинг ҳарбий ядро салоҳиятини кучайтиришга чақирган эди.

Россия узоқ йиллар давомида уран чиқиндиларини кўмиш ва қуролларни синаш, шунингдек, атроф-муҳитга зарар етказувчи ҳарбий машғулотлар ўтказиш учун собиқ Совет республикаларидан фойдаланиб келган.

Путин ўтган ойда Россияни тинчликсевар мамлакат деб атаган, бу сўзлар Россия тарихидаги энг йирик ҳарбий машғулотлар чоғида янграган эди. Бу даъво Кремлнинг дунё бўйлаб олиб бораётган ҳаракатларига тамоман зид келади.