Россиянинг ҳужуми секинлашар экан, иттифоқчилар Украинага кенг кўламли ҳарбий кўмак ваъда қилмоқда

КИЕВ – Сон жиҳатидан ортиқ бўлган Украина армияси Россия қўшинларининг пойтахт ва бошқа йирик шаҳарларни қўлга олиш уринишларига қаршилик қилар экан, мамлакат иттифоқчилари Кремлнинг босқинчилик урушига қарши курашда йирик ҳарбий ёрдам ваъда қилмоқда.

Айрим таҳлилчилар урушдан олдиноқ Киевнинг бир-икки кун ичида қулашини башорат қилган эдилар. Россия кучлари ўтган пайшанба куни Украинага бостириб кирган бўлса-да, душанба (28 феврал) ҳолатига кўра бирорта ҳам йирик шаҳарни қўлга ололмаган.

Бутун дунёдан фавқулодда ёрдам

Россиянинг кичик қўшниси ҳудудида бостириб кирганидан жунбушга келган давлатлар Украинага фавқулодда ёрдам кўрсатишга шошилмоқда.

Европа Иттифоқи (ЕИ) давлатлари Украинага қирувчи самолётлар етказиб беради, деди якшанба куни Европа Иттифоқининг ташқи сиёсат бўйича раҳбари Хосеп Боррел. У иттифоқнинг Киевга 450 миллион евролик (503,8 миллион доллар) қурол-яроғ тақдим этишга рози бўлганини айтди.

Бу «блок тарихида илк марта унинг ҳужумга учраган мамлакатга қурол юбориши», деб хабар беради Axios.

Қўшма Штатлар шанба куни Киевга қўшимча 350 миллион долларлик ҳарбий ёрдам жўнатишини маълум қилди, бу билан охирги бир йил ичида тақдим этилган умумий кўмак миқдори миллиард доллардан ошади.

«Бу жўнатма ҳозирда Украина дуч келаётган зирҳли, ҳаводаги ва бошқа таҳдидларни бартараф этиш учун қўшимча ҳалокатли мудофаа ёрдамини ўз ичига олади», деди АҚШ Давлат котиби Энтони Блинкен.

Германия можаро ҳудудларига қурол экспорт қилмасликка оид узоқ йиллик тақиқни бузиб, шанба куни Украинага 1000 та танкка қарши қурол, 500 та «Стингер» ер-ҳаво ракетаси ва тўққизта гаубица юборишга ваъда берди.

Шунингдек, 14 та зирҳли машина ва 10 минг тонна ёқилғи беғараз тақдим этилади.

Шанба куни снайпер винтовкалари ва дубулғалар жўнатган Нидерландия мудофаа вазирлиги «қисқа фурсатда 200 та Стингер ракетаси» юборилишини айтди.

Канада Украинага ҳалокатли ҳарбий қуроллар юборади ва ўзини ҳимоя қилиш учун Киевга 500 миллион Канада доллари (394 миллион доллар) қарз беради.

Шанба куни Чехия «яқин бир неча соат ичида» 4000 та миномёт, шунингдек, 30 мингта тўппонча, 7000 та автомат, 3000 та пулемёт, кўплаб снайпер винтовкалари ва бир миллион дона патрон юборишини айтди.

Чехлар Киевга умумий қиймати 1,5 миллион евролик (1,7 миллион доллар) 4000 та миномёт ваъда қилган, улар етказиб берилиши кутилмоқда.

Швеция Украинага 5000 та танкка қарши ракета, шунингдек, қуруқ озиқ-овқат ва зирҳли нимчалар юбормоқда.

Бу 1939 йилда Совет Иттифоқи босиб олган Финляндияга ёрдам кўрсатганидан бери Швециянинг уруш ҳолатидаги давлатга илк марта қурол юборишидир.

Украинада йирик диаспорага эга Греция (улардан 10 нафари ҳалок бўлган) «мудофаа жиҳозлари» ҳамда гуманитар ёрдам юбормоқда.

Португалия Украинага тунги кўриш кўзойнаклари, ўқ ўтказмайдиган нимчалар, дубулғалар, гранаталар, ўқ-дори ва G3 автоматик винтовкалари беради.

Руминия ярадорларни 11 ҳарбий госпиталида даволашни, шунингдек, 3 миллион евро (3,4 миллион доллар) қийматидаги ёқилғи, ўқ ўтказмайдиган жилетлар, дубулға ва бошқа «ҳарбий материаллар» юбориш таклифини билдирган.

2020 йилда Ливия ва Суриядаги россияпараст кучларини йўқ қилган турк дронлари Украина ҳарбий ҳаракатлари учун жуда асқотган.

Якшанба куни Украина ҳарбийлари твиттерда Житомир вилоятида Россия ҳарбий колоннасини портлатган дрон видеосини жойлаган.

Турли оммавий ахборот воситалари, шунингдек, Европанинг бир қанча давлатларидан фуқаролар бригадалар тузиб, Россия кучларига қарши жанг қилиш учун Украинага кетаётгани ҳақида хабар бермоқда.

Босқинчиларга қарши туриш

Қуруқликда Россия кучлари ўзлари кутганидек ҳужум қила олмаган.

Душанба куни Украина армияси бир неча бор Россия кучларининг тунда Киев чеккасига бостириб кириш уринишларини қайтарган ва пойтахтга учта ракета зарбаси берилганини айтган.

Хабарга кўра, 5300 та аскар ўлдирилган, 191 танк йўқ қилинган ва натижада Россия ҳужуми «сустлашган».

Украина қўшинларининг сони анча кўп бўлиб, жангларга оддий фуқаролар ҳам қўшилганлар.

Россия қурбонлар сони ҳақида хабар бермаган. Якшанба куни армия аниқ рақамларни кўрсатмаган ҳолда бир қанча аскарлар «ҳалок бўлгани ва жароҳатланганини» тан олди.

Душанба куни Украина президенти Владимир Зеленский россиялик аскарларни хизматдан бош тортишга чақирди.

«Бу ердан даф бўлинглар. Қўмондонларингизга қулоқ солманг. Ташвиқотчиларга ишонманг. Ўз ҳаётингизни сақлаб қолинг», деб айтган у.

Украина расмийлари томонидан жойлаштирилган бошқа видеоларда қўлга олинган россиялик аскарлар уларнинг қўмондонлари шунчаки «машққа» кетаётганларини айтиб ёлғон гапирганлари ҳақида сўзлаб беришган.

Айрим россиялик оилалар украинлар томонидан жойлаштирилган видеоларда Украинани босиб олишга кетган ўғилларини асирлар сафида кўришган, деб хабар берган London Guardian нашри якшанба куни.

Фуқаролар орасидаги йўқотишлар

Уруш Украинанинг тинч фуқаролари учун жиддий зарба бўлди.

Расмий Киевга кўра, пайшанба куни босқин бошланганидан кейин 352 фуқаро, жумладан 14 та ёш бола ҳалок бўлган. Бирлашган Миллатлар Ташкилоти (БМТ) ҳисоби бўйича 102 киши, улар орасида 7 та ёш бола ўлган.

«Ҳозирга келиб, Украинадан қўшни мамлакатларга 500 минг киши қочиб ўтган», деб хабар берган БМТнинг қочқинлар бўйича раиси Филиппо Гранди ўзининг Твиттер саҳифасида.

БМТнинг қочқинлар бўйича олий комиссарлигининг аввалги рақамларига кўра, 280 мингдан ортиқ киши, умумий қочқинларнинг қарийб ярми Польшага кетган.

85 мингга яқин киши Венгрияга, 36 мингдан ортиқ одам Молдовага, 30 минг Словакияга ва яна 300 дан ортиғи Беларусга ўтган, деб хабар берган UNHCR.

Украинани тарк этган кўпчилик бошқа Европа давлатларига ўтиб олишган, деб хабар берган БМТ агентлиги уларнинг сони 34600 та эканини таъкидлаб.