![Cуратда: 20 июн куни Нью-Йоркдаги тадбирда қатнашган россиялик журналист Дмитрий Муратов – унинг тинчлик учун Нобел мукофоти медали Украинадаги уруш туфайли қочқинга айланган болаларни қўллаб-қувватлаш учун кимошди савдосида сотилган. [Кена Бетанкур/AFP]](/cnmi_ca/images/2022/06/21/35882-muratov-medal-auction-739_416.webp)
НЬЮ-ЙОРК – Россиянинг Нобел мукофоти совриндори, «Новая Газета» мустақил нашрининг бош муҳаррири Дмитрий Муратов душанба (21 июн) куни ўзининг Тинчлик учун Нобел мукофоти медалини қочқинга айланган украиналик ёш болаларга ёрдам учун кимошди савдосига қўйди.
103,5 миллион АҚШ долларига баҳоланган медал Нью-Йоркда телефон орқали номаълум одамга сотилар экан, иштирокчилар қарсак чалиб, нархни оширишга бир-бирларини рағбатлантиришган.
Душанба кунги сотувдан тушган даромад 2014 йилда 4,76 миллион АҚШ долларига сотилган Нобел медали рекордидан анча юқори бўлди.
Аввалги таклифдан бир неча ўн миллионга юқори бўлган якуний таклиф келиб тушганида, залдаги кўпчилик, жумладан тадбирга келган ва савдо жараёнини видеога олаётган Муратовнинг ўзи ҳам ҳайратда қолган.
![«Новая газета» бош муҳаррири Дмитрий Муратовга берилган тинчлик бўйича Нобел мукофоти Нью-Йоркдаги ким ошди савдосига қўйилди. Савдодан тушган маблағ ЮНИСЕФнинг украиналик қочқинларга мўлжалланган инсонпарварлик ёрдами учун йўналтирилади. [Новая газета Европа/Twitter]](/cnmi_ca/images/2022/06/21/35885-nobel-medal-auctioned-739_416.webp)
«Новая газета» бош муҳаррири Дмитрий Муратовга берилган тинчлик бўйича Нобел мукофоти Нью-Йоркдаги ким ошди савдосига қўйилди. Савдодан тушган маблағ ЮНИСЕФнинг украиналик қочқинларга мўлжалланган инсонпарварлик ёрдами учун йўналтирилади. [Новая газета Европа/Twitter]
![Ўз кундалигини ушлаб турган 8 яшар украиналик қочқин Егор Кравцов, 3 июн, Украинанинг Запорожье шаҳри. Украина кучларининг Россия қўшинларига қарши мудофааси давом этар экан, Егор Мариуполда махфий кундалик юритган. [Екатерина Клочко/AFP]](/cnmi_ca/images/2022/06/21/35887-ukraine-boy-diary-739_416.webp)
Ўз кундалигини ушлаб турган 8 яшар украиналик қочқин Егор Кравцов, 3 июн, Украинанинг Запорожье шаҳри. Украина кучларининг Россия қўшинларига қарши мудофааси давом этар экан, Егор Мариуполда махфий кундалик юритган. [Екатерина Клочко/AFP]
Муратов 2021 йилда филиппинлик Мария Ресса билан биргаликда Тинчлик учун Нобел мукофотини қўлга киритган. Қўмита жуфтликни «фикр эркинлигини ҳимоя қилиш йўлидаги саъй-ҳаракатлари учун» тақдирлаган.
У 1993 йилда Совет Иттифоқи парчаланганидан кейин бир гуруҳ журналистлар билан «Новая Газета»га асос солган эди.
Бу йил у президент Владимир Путин ҳамда унинг Россия ичида ва ташқарисида олиб бораётган сиёсатини танқид қила олган ягона йирик нашрга айланди.
Москва Кремлнинг ҳарбий кампаниясини танқид қилган ҳар қандай шахсга қатъий қамоқ жазоси тайинлашга оид қонунни қабул қилгач, 28 март куни Россияда «Новая Газета»нинг чоп этилиши вақтинча тўхтаган эди.
Газета Москванинг Украинадаги ҳарбий ҳаракатлари тўхтагунига қадар чоп этилмаслиги хабар қилинган.
Апрел ойида Муратов поездда кетаётганида унинг устига ацетон аралаштирилган мойли бўёқ улоқтиришган.
Муратов медалининг сотувидан келиб тушган маблағ UNICEF [Бирлашган Миллатлар Ташкилотининг болалар жамғармаси] ташкилотининг уруш сабабли бошпанасидан айрилган украиналик ёш болалар учун инсонпарварлик ёрдамига йўналтирилади.
«Болалар учун катта хавф»
UNICEF хабарига кўра, Украинадаги уруш мамлакатдаги 7,5 миллион бола учун улкан хавфдир.
«Энг шиддатли жанглар кечаётган ҳудудлар, аҳоли турар жойлари, шунингдек тиббий муассасаларда сув, электр таъминоти тизими шикастланмоқда ёки йўқ қилинмоқда. Бу болаларни жиддий хавф остида қолдиради», деб хабар берган БМТ идораси.
Июн ойи ўрталарига келиб, етти миллиондан ортиқ одам мамлакат ичида бошпанасиз қолган бўлса, Европа бўйлаб беш миллиондан ортиқ қочқин қайд этилган.
«Бу орада ёш болалар мудҳиш шароитлардаги ер ости бошпаналари ва метро бекатларида ўзларини ҳимоя қилишга мажбур бўлишмоқда», деб хабар берган UNICEF.
Аҳоли пунктларидаги юзлаб мактаблар «оғир артиллерия, ҳаво ҳужумлари ва бошқа портловчи қуроллар билан вайрон этилган бўлса, қолганларидан ахборот марказлари, бошпана, таъминот маркази ёки ҳарбий мақсадларда фойдаланиб келинмоқда», дейилади.
Украинадаги уруш даҳшатлари 8 яшар Егор Кравцовнинг кундалигида сўзлар ва расмлар орқали ифодаланган. Россиялик аскарларга қарши Украина қуролли кучлар шиддатли кураш олиб борган бир вақтда, у Мариупол шаҳрида ўзининг махфий кундалигини юритган.
Бир неча ҳафта оиласи билан ертўлада яшаган, ҳозирда россияликлар назоратига ўтган шаҳардан фронт чизиғидан 100 км узоқликдаги Запорожьега онаси ва опаси билан қочиб кетган Егор кичик кўк дафтарча саҳифаларини тўлдириб чиққан.
Ракета зарбасидан уйларининг шифти уларнинг устига қулаб тушган.
«Белимда яра бор, териси шилиниб кетган. Опамнинг боши ёрилган, онамнинг қўлларидаги мушаклари узилган, оёғида тешик бор», деб ёзилган Егорнинг кундалигида.
Кундаликда кўк сиёҳ билан ҳалокат тасвирланган. Қуролланган одамлар, танклар, вертолёт ва портлаётган бинолар чизилган. Суратларнинг бирида ракета зарбасидан кейин уйнинг қулаётган шифти акс эттирилган.
«Бу шовқин мени қўрқитиб юборди», деб ёзилган унда. Яна бир саҳифада оила аъзолари қандай қилиб бир-бирларининг жароҳатларини боғлашгани ва сув излаб кетишганини тасвирланган.
«Жуда кетгим келяпти», деб ёзган у.
«Иш жойимизда қолишимиз керак»
2000 йилдан бери «Новая Газета»нинг олти журналисти ва ходими, жумладан суриштирувчи мухбир Анна Политковская ўз фаолияти сабабли ўлдирилган.
Муратов ўзининг Нобел мукофотини уларнинг хотирасига бағишлаган.
Душанба куни у журналистларнинг қатъиятини ҳукуматларни чегаралаб турувчи муҳим омил ва урушнинг олдини олиш йўлларидан бири сифатида олқишлаган.
«Ҳар биримиз ариза ёзиб, ишдан бўшашни қанчалик хоҳлаcак ҳам, ўз ишимизда қолишимиз керак», деб айтган у.
Журналист Heritage Auctions томонидан эълон қилинган савдога оид видеолавҳада Нобелни қўлга киритиш «сизни эшитишларига имкон беради», деб айтган.
«Бугуннинг энг муҳим муждаси шуки, одамлар уруш бўлаётганини ва энг кўп азият чекаётганларга ёрдам беришимиз кераклигини тушунишлари керак», деб айтган у.
