![Бу суратда Ирпенга кириш ва тураржой биносини кўриш мумкин. [Олга Чепил/Карвонсарой]](/cnmi_ca/images/2022/06/27/35961-irpin_2-739_416.webp)
![Ирпендаги шикастланган бинолар, май ойи. [Олег Гриб/Ирпен шаҳар ҳокимияти]](/cnmi_ca/images/2022/06/27/35952-destroyedirpin_2-739_416.webp)
![Июн ойида олинган ушбу суратда Ирпен шаҳридаги энг катталаридан бўлган «Титаник» тураржой биносига етказилган зарар кўлами акс этган. [Яна Антонованинг шахсий архиви]](/cnmi_ca/images/2022/06/27/35953-antonova_s_house-739_416.webp)
![Июн ойида олинган ушбу суратда Ирпен шаҳридаги энг катта тураржой биноларидан бири бўлган «Титаник»ка етказилган зарар кўламини кўриш мумкин. [Яна Антонованинг шахсий архиви]](/cnmi_ca/images/2022/06/27/35954-antonova_s_house_2-739_416.webp)
![Шикастланган қаҳвахона, май ойи. [Анна Машченконинг шахсий архиви]](/cnmi_ca/images/2022/06/27/35956-destroyedirpin_1-739_416.webp)
![Май ойида Ирпен шаҳрини қайта тиклаш ишлари олиб борилмоқда. [Олег Гриб/Ирпен шаҳар ҳокимияти]](/cnmi_ca/images/2022/06/27/35957-reconstruction_1-739_416.webp)
![Уйлари вайрон бўлган Ирпен аҳолисига мини-квартира сифатида жиҳозланган ётоқхона вагонлари таклиф қилинмоқда. Ирпен, 2022 йил, июн ойи. [Украина темир йўллари]](/cnmi_ca/images/2022/06/27/35958-train_3-739_416.webp)
![Ҳар бир вагоннинг ўз номи бор. Масалан, улардан бири америкалик актриса Анжелина Жоли шарафига Жолининг уйи деб номланган. Ирпен, 2022 йил, июн ойи. [Украина темир йўллари]](/cnmi_ca/images/2022/06/27/35959-train_2-739_416.webp)
![Ҳудудда шунингдек, болалар учун мўлжалланган ва кўнгилочар жойлар, шийпонли барбекю майдони, юқори тезликдаги интернет ва ҳатто кутубхона ҳам бор. Ирпен, 2022 йил, июн ойи. [Украина темир йўллари]](/cnmi_ca/images/2022/06/27/35960-train_1-739_416.webp)
ИРПЕН, Украина – Россиянинг Украинага бостириб кириши натижасида вайрон бўлган Киев чеккасидаги Ирпен шаҳри бир неча ойдан сўнг аста-секин одатий ҳаётга қайтмоқда.
Ирпен 24 февралда урушнинг илк кунлари шаҳар атрофини эгаллаб олган Москва армиясининг пойтахт томон йўлидаги илк тўсиққа айланган эди.
Украина кучлари Ирпенни март ойи охирида қайтариб олишган.
Қарағай дарахтларига тўла ва одатда осойишталик ҳукм сурган шаҳар расмийларга кўра, Ирпендаги биноларининг ярмидан кўпи Россиянинг ҳаво зарбалари натижасида вайрон бўлган, жумладан, 4000 хонадон ва 2000 та уй тиклаб бўлмайдиган ҳолатга келган.
![Киев чеккасидаги Ирпен шаҳри, май ойида олинган сурат. [Олег Гриб/Ирпен шаҳар ҳокимияти]](/cnmi_ca/images/2022/06/27/35950-irpin-739_416.webp)
Киев чеккасидаги Ирпен шаҳри, май ойида олинган сурат. [Олег Гриб/Ирпен шаҳар ҳокимияти]
«Кенг кўламли артиллерия ҳужумлари натижасида тўлалигича ёниб кетган бутун бошли микрорайонлар бор», дейди Ирпен шаҳрининг собиқ мэри Володимир Карплюк Карвонсаройга.
«28 март куни Ирпен озод қилингани ҳақидаги расмий хабарни эшитганимиздан сўнг... шаҳарни тозалаш ва тартибга келтириш учун бу ерга кўнгиллилар кела бошлади», деди ҳозирда шаҳар инвестициявий кенгашига раҳбарлик қилаётган Карплюк.
Унинг сўзларига кўра, ҳудуд ҳали миналанган бўлса-да, бу ерга кунига беш юз нафар кўнгилли ёрдам бериш учун келган.
«Ҳозирда сув истеъмоли урушдан аввалги ҳажмнинг 50 фоизини ташкил қилмоқда, шу боис Ирпеннинг ярим аҳолиси аллақачон қайтиб келди, дея оламиз», деб таъкидлади Карплюк.
Ҳозирда шаҳарни тиклаш ишлари олиб борилмоқда.
Нидерландияда яшовчи япон миллатига мансуб архитектор ва шаҳарсоз Хироки Мацуура шу ойда Ирпенга ташриф буюрди ва шаҳарнинг янги бош режасини ишлаб чиқишга ваъда берди.
Шаҳар расмийлари қайта тиклашдаги ёрдамга оид музокаралар учун деярли ҳар ҳафта хорижга бориб келишмоқда.
«Аллақачон ижобий натижаларга эришилди. Биз Франция, Белгия ва АҚШга бордик», деди Карплюк. «Маҳаллий компаниялар, расмийлар ва турли жамғармалар билан ҳамкорлик қиляпмиз.»
«Таслим бўлмаймиз. Кузгача аҳолининг 80 фоизи қайтиши кутилмоқда», деди у. «Кейинги вазифамиз маблағ топиш».
«Маблағ топа олсак, барчасини икки йил ичида қайта қуриб ишга туширамиз», деб айтган Карплюк.
«Уйга бормоқчиман»
Бузилган уйларига қайтганларнинг кўпчилиги ёрдам кутаётганига қарамай, қайта тиклаш бўйича ташаббусни ўз қўлларига олган.
Яна Антонова ва унинг турмуш ўртоғи Украина шарқидаги Россия босиб олган Донецкни 2014 йилда тарк этиб, бор пулларига Ирпендан квартира сотиб олишган эди.
Уларнинг биноси шаҳардаги энг катталаридан бири бўлиб, аҳоли орасида «Титаник» номи билан танилган эди.
У урушда катта талофат кўрди.
«Бинога 20 дан ортиқ снаряд келиб тушган. Йигирмата хонадон вайрон бўлган, яна 100 таси жиддий шикастланган, уларнинг деразалари ва деворлари бузилган», деди Антонова.
«Турар жойимизда 408 та хонадон бор. Бу деярли 1,5 минг яшовчи деганидир», деди у хонадонда яшаш жуда хавфли эканини қўшимча қилиб.
Антонова ва бошқа яшовчилар сентябрда ҳаво совиб кетгунига қадар ўз уйларини тузатиб олиш мақсадида мустақил равишда маблағ йиға бошлаганлар.
«Албатта, ҳамма уруш тугашини ва Россиянинг репарация тўлашини кутмоқда. Аммо бу уруш қачон тугаркин?»
«Бошқа яшовчилар ярим миллион гривенга яқин (17 минг АҚШ доллари) пул тўпладилар, аммо бизга 3 миллион (102 минг АҚШ доллари) керак», деб айтган Антонова.
Яшовчиларнинг аксари деразаларни тузатган, уйларга сув ўтмаслиги учун мўриларни қўйиб, тешикларни ямашган.
«Мамлакатни ташлаб кетгим йўқ. Уйга бормоқчиман. Ўзимизнинг кўп қаватли бинодаги хонадонимда яшашни хоҳлайман», дейди Антонова.
Уйлари вайрон бўлганлар эса вақтинчалик турар жойларда яшамоқда.
Ирпендаги «Зализне мистечко» (Темир шаҳарча) номли ёпиқ ҳудуддаги бешта вагон ичида 25 тагача оила яшаши мумкин, деб хабар берган Украина темирйўл компанияси июн ойи бошларида уйларнинг тақдимоти чоғида.
Вагонларда кондиционер, ювиниш хоналари ва кофе машинаси бўлиб, фуқаролар у ерда америкалик бизнесмен Илон Маскнинг Starlink хизмати томонидан тақдим этилган Wi-Fi тармоғига уланишлари мумкин.
Вагон-ресторанда ҳар куни нодавлат ташкилот томонидан тайёрланган таомлар берилади, еттинчи вагон эса ювиниш хоналари, кийим алмаштириш хонаси ва кир ювиш машинаси билан жиҳозланган.
Очиқ ҳудудда эса болалар учун ўйин майдончаси, барбекю ҳудуди, ўриндиқлар, ёғоч столлар ва иккита гамак бор.
Тадбиркорлар қайтмоқда
Бу орада шаҳарга тадбиркорлар ҳам қайтмоқда.
«Шаҳарга бизнесларнинг қарийб 50 фоизи қайтди», дейди собиқ ҳоким Карплюк.
«Албатта, корхоналар, кафе ёки ресторанлар сезиларли талафот кўрган бўлса, жамоатчилик давлатнинг ёрдамини кутмоқда», деб айтган у. «Аммо иш бошлашга оз бўлса-да имкони бўлган кўпчилик хусусий тадбиркорлар шундай қилишмоқда.»
Анна Машченко ва эрининг шаҳарда кофе ва пишириқлар сотадиган иккита дўкони бўлган.
Россия босқини вақтида дўконлардан бири россиялик аскарлар томонидан вайрон қилинган.
«Барча қурилмалар, совуткич, музлаткич ва грилл тузатиб бўлмайдиган ҳолатга келган», деди Машченко. «Аммо биз ёрдам сўрамаганмиз. Иккинчи кафемиз талафот кўрмаганди. Биз ҳали ҳам ўша ерда ишлаяпмиз.»
Россиялик аскарлар шаҳарни тарк этганидан кейин омон қолган кафе биринчилардан бўлиб очилган.
«Эрим 11 апрелда қайтиб келгди. Газ ҳам, сув ҳам йўқ эди, аммо қандайдир мўъжиза туфайли электр қуввати бор эди», дейди Машченко.
«Квартира совуқ бўлгани учун у кафеда тунашга мажбур бўлди. У иситкични ёққан, йиғма каравотни олиб чиққан ҳамда одамларга чой ва кофе тайёрлашга қарор қилган.»
«Илк кўнгиллилар кафега телефонларини қувватлаш учун келишарди, чунки у ерда электр бор эди», деб айтган у.
Машченконинг эри кўнгиллилар, Ҳудудий мудофаа кучлари ва полицияга бепул кофе тарқатган.
Жуфтлик энди ҳар куни ишламоқда ва бизнес юриша бошлаган.
«Ҳозирги ва урушдан аввалги вазиятни солиштириб бўлмайди», деб айтган Машченко. «Даромад кам, аммо ҳечқиси йўқ, одамлар аста-секин қайтиб келишмоқда.»
«Бу келганларнинг сонидан ҳам маълум. Ҳар куни янги мижозлар пайдо бўлмоқда.»
«Ҳаммаси яхши бўлишига ишонаман.»
Худди фақат Ирпен шундай ҳолатдадек! Шаҳарлар ва қишлоқлар эса кундан-кунга вайрон бўлмоқда, руслар эса бегуноҳ одамларни ўлдирмоқда.
Жавоб беришФикрлар 5
Бир савол бор: украиналиклар ўз минтақаларини қандай тиклаяптилар, ахир иқтисодиёт доим у қадар яхши бўлмаган, афтидан бу одамлар енгилмас экан. Уруш ҳали тугагани йўқ, лекин улар Ирпен-2.0ни қайта қуришди
Жавоб беришФикрлар 5
Хонадонлар қайта тикланади; Умид қиламанки, у ерда жойлашган бизнеслар ҳам омон қолади ва тикланиш жараёни тезроқ кечади.
Жавоб беришФикрлар 5
«Таслим бўлмаймиз. Кузгача аҳолининг 80 фоизи қайтиши кутилмоқда», деди у. «Кейинги вазифамиз маблағ топиш», деди Карплюк. Балки улар маблағ топа оларлар, аммо бу ҳужумлар ва ваҳшийликлардан кейин аҳолининг 80 фоизи тирик қолдими-йўқми, номаълум.
Жавоб беришФикрлар 5
Украиналикларни биламиз, улар ҳамма нарсани тезда тиклаб олишади; Муҳими, Россия яна ўзининг қонли қоидалари билан «тинчлик» ўрнатишга келмасин. Аммо украиналиклар ўзларининг чидамлилиги ва хотиржамлиги билан ҳайратга солишда давом этмоқдалар.
Жавоб беришФикрлар 5