Юртидан узоқда яшаётган россияликлар хориждаги украиналикларга ёрдам бермоқда

ВАРШАВА – Москвада яшовчи Александр Огиенко ўтган йил охирида военкоматдан чақирув қоғози олганидан сўнг Россияни тарк этган эди.

У Санкт-Петербурггача поездда бориб, автобусда Финляндия чегарасини кесиб ўтган, у ердан Полшага ва якунда пойтахт Варшавага етиб олган.

Ўшандан бери у «Украинага илиқлик» ва «Russians for Ukraine» гуруҳларига қўшилиб, Кремл босқинидан азият чеккан украиналикларга ёрдам бериш учун кўнгиллилар сафидан жой олган кўп сонли руслардан бирига айланди.

«Украинага илиқлик» дастури доирасида турли мамлакатлар фуқаролари Украинадаги муҳтож инсонлар учун генераторлар хайрия қилишмоқда.

Огиенконинг айтишича, унга ўхшаган россияликлар кўп.

У «Украинага илиқлик» гуруҳининг яна бир аъзоси, екатеринбурглик Екатерина Сурсяковани тилга олди. У болалари билан Полшага кўчиб ўтган.

Бу аёл Россияда урушга қарши намойиш ўтказгани учун 530 000 рублга (6925 АҚШ доллари) тенг йирик жаримага тортилган. У жиноий жавобгарликка тортилиши, болалари эса меҳрибонлик уйига топширилиши мумкин эди.

«Мемориал» ҳуқуқбон ташкилоти уни Польшага эвакуация қилди.

«Ўз мамлакати учун бошқача келажак қура оладиган жуда кўп одамлар Россияни тарк этгани ачинарли», дейди Огиенко Карвонсаройга.

Кўнгиллилар гуруҳлари украиналик қочқинларни кутиб олади ва икки кичик чегара шаҳри – Пшемысл ва Медикадан Украинага гуманитар ёрдам жўнатади.

Ўтган баҳорда Россиянинг Калининград шаҳридан Полшага йўл олган Иван Зайковский ҳам «Украинага илиқлик» гуруҳига қўшилган.

Мутахассислиги электрик бўлган Иван қайси компаниянинг қайси генераторларини сотиб олиш кераклигини яхши билади.

Зайковскийнинг ўзи ҳам, унинг ити Веста ҳам медикаликларга яхши таниш.

«У одамларнинг кайфиятини яхши сезади ва маънавий ёрдамга муҳтожларнинг олдига боради. Вестага қойил қолиш керак, у бўлмаганида, буларнинг барчасига қандай дош берардим, билмайман», дейди Зайковский Карвонсаройга.

Қийинчиликларни енгиллатиш

«Украинага илиқлик» лойиҳаси ташаббускорларидан бири Москванинг Соколский туман кенгашининг собиқ депутати Мария Соленовадир.

Уруш бошланганидан сўнг Полшага қочиб келган россияликларни кўнгиллилар гуруҳига қўшилишга ва украиналикларга ёрдам беришга ундаш шарт бўлгани йўқ, дейди у.

«Бизга кўнгиллилар кераклигини ҳеч қаерда эълон қилмадик. Ҳамма бизга ўзи мурожаат қилиб келди», деди у Карвонсаройга.

«Веб-сайтларнинг таржимаси бўйича ёрдам таклиф қилишди, чунки бизда саккиз тилдаги версиялар бор, бу жуда кўп меҳнат талаб қилади», деди у.

«Ҳар сафар юк ортилган машиналар келганида, уни туширишга ким ёрдам беради деган савол пайдо бўлмаган – ҳамма бир вақтда ёрдамга чиқар эди», деб қўшимча қилди у.

«Албатта, ҳаммаси идеал эмас: биз логистика бўйича мутахассис эмасмиз ва дастлаб машиналарни қаердан олишни, ҳайдовчиларни қандай излаш кераклигини билмасдик. Синовлар ва хатолар йўли орқали кўп нарсаларни ўргандик».

Шундай муаммоларга қарамай, «Украинага илиқлик» гуруҳи 2022 йил ноябрдан 2023 йил феврал ойи охиригача Украинага қарийб 400000 евро (434000 АҚШ доллари) қийматидаги товарларни йиғиб, етказиб берди.

Соленова Қон топшириш марказининг энергия эҳтиёжларини тўлиқ таъминлаган 100 ваттли генераторнинг муваффақиятли сотиб олиниши ва Харковга етказиб берилиши билан боғлиқ воқеани алоҳида зикр қилди.

«Ҳаммаси муваффақиятли бўлганини билиб, болалар каби қувондик. Чунки, «катта темир қути»нинг керакли жойга етиб боргани ушбу марказ ишини анча осонлаштиришини ва қон қуйишга муҳтож бўлган кўплаб одамларнинг ҳаётини сақлаб қолишини билардик.»

Яқинда кимдир унга ёниб кетган уй олдида турган украиналиклар электр генераторини юборгани учун россиялик кўнгиллиларга миннатдорчилик билдирган видеони юборган.

«Албатта, биз Украинада яшовчи одамларнинг бошига тушган азоб-уқубатларнинг юздан бирини ҳам бошдан кечирганимиз йўқ.»

«Аминманки, у ерга бориб, шунга ўхшаш нарсадан ўтмагунча, буни тўлиқ тушуниш имконсиз», деди Соленова.

Россия тажовузига қарши кураш

Англиянинг Кембриж шаҳрида яшовчи Алина Иванова «Украинага илиқлик» гурухини масофадан қўллаб-қувватлайди.

У Буюк Британияда жойлашган демократияни тарғиб қилувчи ва Россияда инсон ҳуқуқлари бузилишлари ҳақида хабардорликни оширувчи россиялик спикерлардан иборат Россия демократик жамияти (RDS) гуруҳининг кўнгиллисидир.

RDS таркибида йигирматача фаол иштирокчи ва бир қанча вақтинчалик дастакчилар мавжуд. 35 яшар Иванова ҳазиломуз тарзда ўзини «кекса авлод вакили» деб атайди.

Ташкилот Бирлашга Қиролликда яшайдиган ва турли соҳаларда ишлайдиган шахслардан иборат: улар орасида тадбиркорлар, IT мутахассислари, рассомлар, фотографлар, маркетинг бўйича маслаҳатчилар, университет тадқиқотчилари ва талабалар бор.

«Биз Украинани қўллаб-қувватлаймиз, Украинага Россия тажовузига қарши курашишида ёрдам бериш эса миссиямизнинг бир қисмидир», деб айтган Иванова Карвонсаройга.

Унинг сўзларига кўра, гуруҳ Россия Украинага кенг қамровли ҳужум бошлаганидан сўнг ташкил қилинган. Унинг аъзолари Лондонда урушга қарши ҳаракатларни илгари суриб, Украина учун маблағ тўплайдилар.

Шу мақсадда RDS аъзолари Украина шаҳарлари учун генераторлар сотиб олишга хайрия пули тўплашнинг турли йўлларини ўйлаб топишди. Улар ижтимоий тармоқларда маълумот қолдириб, кузатувчиларидан дўстларига ва қариндошларига бу ташаббус ҳақида хабар беришни сўрашган.

Вақти келиб уларга Винница миллий тиббиёт университети клиникасига ички қон кетишини аниқлаш жиҳози учун пул йиғиш таклифи келиб тушган.

Улар бир неча ҳафта давомида зарурий техника ишлаб чиқарувчиларни излашган. Тўлиқ рўйхат тузилгач, барча ашёларни сотиб олиш учун 22 минг фунт стерлинг (27110 АҚШ доллари) керак бўлишини аниқлашган.

Буюк Британияда яшовчи украиналик ёш рассом жиҳозларни молиялаштириш учун иккита суратини аукционда сотувга қўйган.

RDS директори Ксения Максимова яна битта суратни хайрия қилган. Бошқа аъзолар қўшимча таклифлар қилишган.

Россия фуқароларидан ёрдам олган украиналиклар «турлича реакция» билдирадилар, дейди Иванова.

«Украинага гуманитар ёрдам ортилган машиналар етиб келган, аммо тиббий раҳбар жиҳозларни қабул қилиб олмаган ҳолатлар бўлган. Бироқ, биз учун ёрдамимиз керакли жойга етиб бориши муҳим», деб айтган у.