Xitoy muhtoj mamlakatlarga koronavirusga oid nosoz uskunalarini sotish ortidan milliardlab daromad koʻrmoqda

Xitoy rejimi mart oyidan beri koronavirus pandemiyasiga qarshi kurashayotgan xorijiy mamlakatlarga niqoblar va boshqa himoya vositalarini sotishdan milliardlab dollar daromad qilayotgan bir paytda, uning sifatsiz yoki nosoz tibbiy mahsulotlaridan shikoyat qilayotgan mamlakatlar soni oshgan.

Inqiroz sharoitida oʻzini olijanob qudratli davlat deb koʻrsatishga urinayotgan Pekin butun dunyoga, jumladan, Afgʻoniston, Pokiston, Markaziy Osiyo, Yaqin Sharq va Yevropaga tibbiy jihozlar eksport qilmoqda.

Xitoyda COVID-19 holatlari kamayib borayotganiga qaramay, Pekin mamlakatdagi fabrikalarni tibbiy vositalar ishlab chiqarishni koʻpaytirishga ragʻbatlantirmoqda, zero pandemiya butun dunyo boʻylab qariyb 90 ming kishini hayotdan olib ketishga ulgurdi.

1-martdan beri Xitoy 3,86 milliard dona niqob, 37,5 million dona himoya kombinezoni, 16000 ta sunʼiy nafas oldirish moslamasi va 2,84 million dona COVID-19 testlarini eksport qildi. 50 dan ortiq davlatdan buyurtmalar olindi, deb maʼlum qilgan shu hafta boshida Xitoy bojxona xizmati rasmiysi Jin Xay.

Shunday boʻlsa-da, bir qator davlatlar, jumladan Gollandiya, Filippin, Xorvatiya, Turkiya va Ispaniya Xitoydan keltirilgan tibbiy vositalarning sifatsiz yoki yaroqsiz ekanligidan shikoyat qilishgan.

Finlyandiya tomonidan sotib olingan ikki million dona himoya niqobi shifoxonalarda foydalanish uchun yaroqsiz boʻlib chiqdi, deb tasdiqlagan Finlyandiya hukumati 8-aprel, chorshanba kuni.

Mutasaddilarning taʼkidlashicha, yuz niqoblari tibbiy muhitda foydalanish uchun koronavirusdan himoya standartlariga javob bermagan.

Oʻtgan haftada Gollandiya hukumati Xitoyning sifat standartlariga javob bermaydigan 1,3 mln. niqobidan 600 mingtasini qaytarib yuborgan.

Shuningdek, oʻtgan haftada Ispaniya vakolatsiz Xitoy kompaniyasi tomonidan yuborilgan minglab tezkor test toʻplamlarini ishonchsiz deb topib, ularni qabul qilishdan bosh tortgan.

Xitoy tovarlari bilan bogʻliq shunga oʻxshash shikoyatlar dunyoning boshqa mamlakatlaridan ham olinmoqda.

Tarixni qayta yozish

Pekin turli fitna nazariyalarini tarqatib, dunyoni larzaga keltirgan koronavirusning tarqalib ketishi bilan bogʻliq aybni doimiy ravishda oʻzidan soqit qilishga urinar ekan, muruvvatli davlat boʻlib koʻrinishga harakat qilmoqda.

Rasmiylar Xitoyda paydo boʻlgan virus dunyo boʻylab mislsiz oqibatlarni keltirib chiqarayotganini anglab yetgach, Xitoyning dezinformatsiya mashinasi ishga tushgan edi.

Yevropa Ittifoqi, NATO va Katta yettilik davlatlari Xitoy rejimiga qarshi eʼtiroz bildirib, uning butun dunyoda insonlar hayotini xavf ostida qoldirayotgani, demokratik jamiyatlarga putur yetkazib, koronavirus pandemiyasi haqida zararli maʼlumot tarqatishda davom etayotgani qoraladilar.

Virusning vatani boʻlgan Uxanda yangi kasallanish holatlari qayd etilmaganini iddao qilayotgan Xitoy rasmiylari maʼlumotlarining naqadar ishonchli ekani xalqaro hamjamiyatni xavotirga solmoqda.

Xitoy rasmiylari avval-boshdan yangi koronavirus masalasida shaffofroq boʻlganlarida, dunyo hozirda COVID-19ga qarshi kurash uchun ancha yaxshi holatda boʻlar edi, deydi yetakchi kuzatuvchilar.